Monday, April 30, 2007

تليفون ابكانى.......سامحينى ارجوكى

انا مش عارفه ابتدى منين الكلام انا كنت ناويه اعمل بوست تعليق عن كلام شاب مصرى
بس انا لسه قافله الخط مع واحده صحبتى اوى وعزيزه عليا اوى
وبجد مقدرتش اكتب كلمه عن الموضوع
والبوست ده انا عاملاه ليها هى
بجد اتالمت كتير اوى من كلامك معايا على التليفون وبكيت بعد ما قفلت معاكى الخط
انا مش هقول اعذار ولا هطلب منك انك تلتمسى ليا اعذار
انا كل الى هطلبه منك انك تسامحينى من قلبك
انا مش عارفه انا عملت فيكى حاجه حلوه تفتكرهالى ولا لا
اتمنى انى الاقى رصيد ليا عندك يغفرلى الغلطه دى
وبجد والله انا مش بفضل مصلحتى على اخواتى...انا بجد زعلانه ان الحركه خرجت منى كده فى الاخر
بس بجد وبتكلم بكل صدق وربنا شاهد على الى هقوله
له الحاجه دى مضايقاكى انى اكمل فيها فانا مستعده اسيبها عشانك
انا عمرى ماهضحى بيكى عشان اى حاجه خاصه لو كانت دنيا
الفرص دايما بتيجى وتروح لكن الاصدقاء عمرى ماعرف اعوضهم
انا مش هاعرف انام الا بجد لما تقوليلى انك مسامحه من كل قلبك
وباعترف انى غلطت فى حقك واخطات
واطلب السماح والغفران...وهى حاجه مش بعيده عليكى

Saturday, April 28, 2007

بابا حبيبى


اليوم يصادف يوم ميلاد ابى هيتم ال53 سنه....عقبال عندكم
وبهذه المناسبه السعيده قلت اكتب عن لمحات فى حياه ابى
اولا : نشأته
نشأ ابى فى بلده ناهيا بالجيزه وهى بلده ريفيه بس اهلها طيبين اوى
مات جدى الى هو والده عندما بلغ ابى ال6 سنين يعنى بابا اتربى يتيم الاب
وكان هو اصغر اولاده ويعتبر عمى الاكبر هو الى مربيه
كانت الهوايه المعروفه لابى فى الصغر والى الان هى القراءه
كان بيحوش مصروفه ويروح المدرسه مشى عشان يشترى كتب يقراءها
ثانيا : تعليمه
الصراحه انا مش عارفه بابا بيحب العلم اوى كده ازاى
يعنى هو فى الاول متخرج من طب القاهره
وبعدين اخد ليسانس الحقوق وهو عضو مجلس شعب وده عشان يتكلم فى المجلس عن علم
وبعدين اخد شريعه ازهر بتقدير امتياز
ومعاها اخد ليسانس اداب تاريخ بتقدير جيد جدا
واخر شهادتين اخدهم وهو فى سجن المزرعه لما كان محكوم عليه بخمس سنين
وكان بدا فى معهد القراءات بس لانشغاله لما خرج من السجن مقدرش يكمل فيه
ثالثا : حياته معانا
مش قادره انسى اللقاء اليومى الى كان بابا بيعمله معانا بعد الفجر يوميا وده كان قبل اعتقال 95 يعنى كنت صغيره
كل الى افتكره دعاء شروق الشمس الى كنا بيحفظهولنا يوميا
اما بقى الخمس سنين بتوع المزرعه
كانت طريقه التواصل بينا وبين بابا الجوابات
مكنش بيفوت مناسبه ولو صغيره الا ولازم يبعت ليها جواب
بدايه الدراسه والهجره والمولد وعمليه الزايده الى عملتها
يااااااه...مش قادره انسى جوابات قبل الامتحان .....كان بيعملى جدول كل ترم اذاكر كل ماده ازاى وجدول لتنظيم وقتى
مفيش مناسبه الا ولازم يبعت جواب
لما خرج بقى....كانت ايام الامتحانات دى بعيش ملكه فى البيت...بابا كان لازم يعملى القهوه والفطار الصبح بعد الفجر عشان يشجعنى على المذاكره
ولو مش فاهمه حاجه يحاول يقرأها معايا ويشرحهالى
ولا الجلسه الاسبوعيه الى كنا بنقعدها بعد ما خرج من الخمس سنين كانت حكايه
كانت الفقره الاساسيه فيها حكم بن عطاء الله
كان بيشرحهالنا ويخلينا نحفظها ويعملنا فيها مسابقه
بجد كانت ايام حلوه اوى ...للاسف مش بنقدر نقعد القاعده دى دلوقتى ..بسبب مشغولياتنا كلنا ...بس بجد هحاول ارجعها تانى
رابعا : بابا مع نفسه
بابا عنده طقوس يوميه لا يمكن لاحد المساس بها اطلاقا
اولا يصحى الفجر او قبل الفجر بشويه ....يصلى
وبعدين يطلع من المسجد ...لابد من فنجان القهوه الصباحى مع فصين طوم مع 7 تمرات على السنه
وبعدين ينزل يتمشى ساعه تقريبا واذاعه لندن فى ودنه والسبحه فى ايده ولسانه مع اذكار الصباح
وهو راجع من المشى لازم يكون هناك وقفه عند الراجل بتاع الجرايد...ياخد جوله سريعه على الجرايد كلها وهو واقف
وبعدين يطلع ياخد الدش بتاعه
وبيكتب ما يفتح الله به عليه من مقالات وابحاث
ويروح المكتب والنقابه وباقى مشغولياته
وبيرجع غالبا بعد الظهر يتغدى وينام ويصحى ياخد الفنجان التانى والجنزبيل واحيانا الشاى الاخضر
وبعدين يتفرج على الجزيره والبي بي سي والسى ان ان
يعنى وكالات الانباء كلها
ونظره على الجرايد تانى كلها بس المره دى بتمعن
ولازم يقرا فى الحكم كل يوم ...عشان بيشرحها للناس بعد الفجر
حكايه بابا مع الحكم دى هعملها تدوينه خاصه
بس بجد انا بفتخر ان الراجل ده بابايا
كان نفسى احكى اكتر من كده كتير
بس الحكاوى مش هتخلص عليه
لو قدرت ممكن اعمله تدوينه تانيه
وفى الاخر بدعيله
كل عام وانت الى اقرب وعلى طاعته ادوم وللجنه اقرب وللنار ابعد وللقران احفظ وللرسول اتبع

Thursday, April 26, 2007

جسر التواصل




وانا اتصفح المدونات فى الفتره الاخيره


لاحظت ان هناك مجموعه من الشباب الاخوان لديهم رؤى مستقبليه للاخوان


ونقد ذاتى للاخوان


وتساؤلات كثيره حول الوضع الحالى للاخوان


وهم لا يتكلمون بلسان حالهم فقط ولكن عندما تقرا لهم تجد ان هذه التساؤلات تدور فى اذهان اغلب الشباب


ولكن لماذا؟؟؟؟


لماذا ذلك الغموض حول مستقبل الاخوان ؟


لماذا ذلك الغموض حول مواقف الاخوان؟


اعلم انى انتمى لجماعه هى من اكثر القوى المؤثره على الساحه العالميه وليست المصريه فحسب


كما اننى اثق فى قيادتنا تمام الثقه


واعلم ان لديهم من الخبره ما يطمئنى الى حد ما على مستقبلنا


ولكن ارى مشكله كبيره تواجهنا نحن الشباب


وهى الانفصال عن قيادتنا بصرف النظر عن السبب


نحن الشباب فى اشد الاحتياج الى من يسمعنا ويستوعبنا من قادتنا


فاتحت ابى بما يدور فى خالدى من تلك الافكار


وسالته لماذا لا يدخل مدوناتنا نحن الشباب ويرى ما نكتب وعلى ماذا نعترض وعن ماذا نتسائل


فرد علىٌ بان ابعث له لينكات المدونات على ميله الخاص


لكنى لا اراه حلا سليما


فلماذا لا يكون هناك لقاء دائم بين قيادات الاخوان وشباب الاخوان على شكل صالون مثلا يكون وصله بين الاجيال


يكون بمثابه جسر تواصل بين القيادات الحاليين وقيادات المستقل


هذا مجرد اقتراح اتمنى من الجميع ان يدلى برايه ومن يرى اقتراح اخر فلا يبخل علينا ؟؟؟؟؟


وجزاكم الله خيرا

Tuesday, April 24, 2007

اين الامان؟؟؟؟






القت القوات المصريه القبض على السيد محمد سيد صابر بتهمه التجسس



اصدرت المحكمه اليوم الحكم على العطار بالسجن 15 سنه بتهمه التجسس



كان من المفترض ان يسعد الانسان من هذين الخبرين وان يبجل فى نشاط اجهزه الامن المصريه لحفاظها على امن البلاد



لكن عند سماعى هذه الاخبار لم اشعر باى سعاده فقد دب الشك الى قلبى



واخذت اتسائل عن صدق الاجهزه الامنيه فى مصر



فبصراحه ما تفعله الاجهزه الامنيه فى مصر فى المواطنين من تلفيق اتهامات واعتقالات مستمره بسبب وبدون سبب تجعل كل من يقرا هذه الاخبار يفقد الثقه فى حكومتنا الموقره



كيف اثق وقد دفع ابى اكثر من سبع سنوات من عمره فى السجن ظلما وزورا



كيف اثق ونحن الان نرى اخواننا الشرفاء وراء القضبان يتهمون بقضيه غسيل الاموال



اصبحت اشك فى كل مسجون هل فعلا يستحق السجن ام ان التهمه ملفقه لانه سب هذا من الوزاره او لعن هذا من الرئاسه



لم يعد هناك امن يشعر به الانسان فى وطنه



فبالله عليكم اين اشعر بالامان وانا فى بيتى ومهدده ان يدخل علىٌ ايأ من رجال امن الدوله فى اى وقت وما ذلك منا ببعيد



اشك ان يكون شرب هؤلاء المسئولين من نيل مصر



يمكن بيستوردو مياههم من امريكا فاصبح ولائهم لامريكا بدلا من مصر



بجد نفسى اعيش فى بلدى من غير ظلم



او قهر



او شك



نفسى البلد دى تنضف من كل الى بيلوثوها باعمالهم



يا رب امتى الفرج؟؟؟؟؟


Saturday, April 21, 2007

تاج

ده تاج من اختى اسماء هاعيش واتحدى احزانى


ماذا استفدت من حمله اعتقال االاخوان الاخيرة........هل استفدت معنوياكسبت اصدقاء جددعرفت حاجات مكنتش عارفهايعنى حاجات من
دى؟؟؟؟؟؟

نعم اكيد استفدت من حمله الاعتقالات دى

يمكن اول حاجه جت على بالى هو تفكيرى فى السبب

فقلت لنفسى انه لاما ابتلاء من ربنا....لان ربنا بيبتلى عباده المؤمنين...وهنا يكون موقفنا الصبر

وبرده فكرت انها شئى ياكد اننا على الدرب الصحيح

لاما يكون تمحيص من ربنا لينا وانا هنا اقصد الاخوان عامه وليس المعتقلين فقط وهنا نحتاج الى اعاده نظر فى كثير من الامور

ومحاوله تصحيح اوضاع كثيره

وتالت حاجه فكرت فيها هى ان ده يكون بذنوبنا "اقصد الاخوان عامه وليس المعتقلين" وهنا يستوجب الاستغفار

على مستوايا الشخصى شعرت بالمسئوليه الذاتيه اتجاه الاعتقالات دى لانى فرد من الاخوان وبالتالى اعدت النظر فى كثير من افعالى وقبل هذا بعلاقتى بربى

وبس



Friday, April 20, 2007

ألم الحيره





من السهل عليك أن تأكل ما تريد ...


أو أن تذهب إلى حيث شئت ...


أو أن تتحدث إلى من تريد ...


أو أن تقاطع من تريد ...


أو أن تشتري ما تريد ...


أو أن تقرأ ماتريد


أو أن تلبس ماتريد


لكــــــــــــن ....


من الصعب عليك أن تقرار ماتريد ...


خــــاصة ...


إذا كان قرارك لا يخصك واحدك يل يخص أشخاص آخرين ... من الممكن ان يغضبوا لهذا القرار ... ليس فقط الغضب بل سيلحق بهم الآذى ...


حينهـــــــا


تتوقف لحظات ... بل أيام قد تمتد لشهور قبل أن تتخذ القرار ...


حينهـــــــا


يتملكك ألم الحيره ....


العقل أم العاطفه ...؟!!


أنت أم الأخرين ...؟!!


لاتدري مــــاذا تفعل ...؟!!


أو كيف تفكر ...؟!!


تتمنى ....


تتمنى حينهـــا لو يتوقف الزمن حتى لا تتخذ القرار ...!!


تتمنى لو أن القرار ليس بيدك أنت ...!!


تتمنى أن تنتهي بك الحياة قبل أن تنهي حياة الآخرين ...!!


أو


أن تعيش جسد بلا روح

Tuesday, April 10, 2007

اشخاص فى حياتى

كل منا يقابل الكثير من البشر يوميا

منهم من يمر عليك ولا تبالى به ومنهم من يلفت انتباهك

ومنهم بعد مرور وقت من الزمن والعشره ترى فيه الصديق ومنهم من تفضل الابتعاد عنه ليس لسوء فيه ولكن لعدم اتفاق الطباع

منهم من تتعلم منه فى الحال حتى وان لم تراه ثانيا ومنهم من تتعلم منه الصواب ومنهم من تتعلم منه الخبيث

احببت ان اتحدث عن اناس صادفتهم فى حياتى واصبحو يعنو لى الكثير

هبدا بالحديث عن اسماء العريان.....الى هى اختى محدش يستغرب

اعرفها من 17 سنه كنا نتقاسم سرير واحد الى ان افترقنا كلا فى حجرته من 5 سنوات

طوال المده التى نتقاسم فيها الحجره والسرير كنا على غير وفاق فانا اختلف عنها كثيرا

فهى الشخصيه المتكلمه والمعترضه والمجادله فى البيت وانا الشخصيه المسالمه الصامته المستسلمه دائما ...سابقا مش دلوقتى :D

كنت اعترض دائما على طريقتها فى الحياه....ومازلت بس مش زى الاول

اسماء من يلقاها لاول مره يراها خفيفه الظل ومتكلمه جيده جدا وممكن تعرف عنها كل حاجه من اول مره

المهم بعد ان انفصلنا وكل واحد اصبح لديه غرفته الخاصه...قلت العراكات بيننا كثيرا

ومرت سنتين او 3 سنوات من الابتعاد وعدم وجود لغه حوار مشتركه بيننا

الى ان دخلت اسماء الجامعه ودخلت القسم الى انا كنت فيه ...علم نفس

فبدا يكون هناك بوادر حديث مشترك

ثم تلا ذلك تسجيلى انا وهى فى كل الطلبه...فالمسافه قلت كتير

ثم شباب الخير...الذى كان له فضل كبير فى توطيد علاقتنا

المهم انا بحكى ده كله ليه

لانى استفدت حاجه حلوه اوى من علاقتى باسماء

ان رغم اختلاف الشخصيات فمن الممكن ان تجد شئ مشترك يكون بدايه الاتصال بهذا الشخص :)


كنت انوى ان اتكلم عن شروق الشواف ورحاب وسميه

بس فى حلقه قادمه ان شاء الله :)

Monday, April 9, 2007

تاج

اتكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارسته؟

ده تاج مرسل من الاستاذ محمود سعيد ....جزاه الله خيرا :)


الهوايه الى لما امارسها بستغرق فيها بجد ومن غير تريقه هى قراءه القصص وخاصه قصص ميكى

يمكن الى شافنى فى المؤتمر كان لاحظ الموضوع ده بما انى فى فترات الراحه كنت بنكب على قصه ميكى ومسبهاش غير لما حد ينادى عليا كذا مره وكنت موصيه اسماء شحاته لما حد ينادينى تخبطنى جامد عشان اخد بالى

ده غير قصص اجاتا جريستى الى كنت واخداها من شروق وكل يوم اتسلى على قصه وماما تنادينى وما من مجيب

اخر ما زهقت اخدت القصص من ورايا ونزلتها لشروق وقالتلها متدهالهاش تانى

العجيب فى الموضوع ده ان الى سال على القصص ساعتها بابا مش انا :)

بس انا عامه هوايتى القراءه

Saturday, April 7, 2007

اشتقت اليـــــك



إلهى....اشتاقت نفسى لرؤياك

إلهي ......اشتاقت روحي للصعود إلي السماء

هناك...
......حيث النعيم

هناك.......حيث متعه النظر إليك.........إلي وجهك الكريم

هناك......حيث الرسول.......وصحبه الجنان
هناك......حيث النعيم .......الذي لا يضاهيه نعيم

الهى ألم يحن الأوان بعد....فإني قد مللت الإنتظار

ترى سيأتى هذا اليوم ......أم انني لا أستحق

أرجوك ربي.........لا تحرمنى هذا اللقاء......فإنى في أشد الإحتياج

أشتاق ربي لرؤيتك.....لزيارتك.....وقبل ذلك عبادتك

فعلمنى ربي كيف أعبدك حق العباده .........كى أراك يوم اللقاء

Friday, April 6, 2007

وتستمر الحيــــــــــــاة


فكرت كثيرا قبل أن اقوم بعمل المدونه وأن ادخل عالم التدوين ولكن بوجود الكثير من الافكار تدور فى رأسى
افكار متناثره تخص السياسه والدين والشباب ومنها افكار خاصه تعبر عنى وحدى ولكن لاحظت ان أفكارى حتى الخاص منها تعبر عن كثير من الشباب
فأثرت ان اخرجها لعلها تفيد ولعل احد يجد فيها ضالته فقررت ان ادون حتى لا تذهب افكارى سدى
اما عن اسم المدونه فأخذت ابحث ان أسم يعبر عن كل ما سأكتب :(السياسى-الشخصى-الاجتماعى-الفكرى)
فوجدت ان ايٌا كان الحدث سياسى او شخصى فالحياه تستمر من بعده بصرف النظر عن نوع الحدث(جيد ام سئ)
اما عن المدونه فهى تعبر عن خواطرى وارائى واتجاهاتى
بمعنى انها تعبر عنى فقط
وارجو من المولى ان يسدد خطايا نحو الدرب الصحيح