Monday, May 14, 2007

فضفضه فى يوم ميلادى


بصو بقى انا كنت كاتبه موضوع طويل عريض وبعد ما كتبته اتمسح غلط

ودى مش اول مره يعملها معايا انا تعبت وزهقت

كنت داخله افضفض لانى مضايقه اوى بس بجد اتنرفزت

انا كرهت الكمبيوتر على المدونه المنيله دى على البوست المنيل ده كمان

ونفسى اضرب حد اطلع فيه الغل الى جوايا ده

كتبت من كام يوم بوست طويل عريض برده

ولسه هانزله راح النور قطع

روحت والله ما انا منزلاه وفعلا منزلتهوش

مش عايزه احلف على حاجه دلوقتى

نرجع للموضوع انا كنت داخله اقول ايه؟؟؟؟؟؟؟؟؟

اه افتكرت

انا كنت داخله اكلم نفسى لانى مش عايزه اكلم حد فمحدش يستغرب من الى هيتكتب

اعتبرونى واحده مجنونه وبتتكلم نفسها

ها يا ست سميه عايزه تقولى ايه ايه الى مضايقك قولى وخلصينى

حاضر هتكلم بس براحه عليا شويه

انا المفروض انهارده انى تميت سن الرشد يعنى 21 سنه وبدل ما ابقى مبسوطه وفرحانه فانا مخنوقه

هتقوليلى ليه مخنوقه هاقولك اهو



1-حاسه انى تايهه ومش عارفه انا رايحه فين

يعنى مش قادره افهم نفسى ومش عارفه انا عايزه ايه

كل اما امشى فى طريق اكتشف انه مش طريقى ولا اهدافى ولا شخصيتى اروح راجعه فى نص السكه

متخرجه بقالى سنه وما انجزتش اى حاجه فى حاجه

نفسى انجز فى المجتمع واعمل حاجه عليها القيمه

مش عايزه ابقى زى اى بنت اتخرجت واتجوزت وقعدت فى البيت

نفسى اعمل حاجه لنفسى وللمجتمع

نفسى احس انى بادى الناس حاجه وفى نفس الوقت تبقى مناسبه لقدراتى ومهاراتى ومواهبى

بس المشكله انى مش عارفه ايه هى قدراتى ومواهبى دى

عماله اجرب وانا مغمضه وكل شويه اكتشف انى ماشيه غلط

ربنا يهدينى ويصلح لى حالى

هذا فضلا عن القران الى حفظته ونسيته والورد الى وقع نصه واخلاقك الى باظت....يا حفيظ

ربنا يهديكى يا سميه ويصلح حالك يا رب

قولو امين



2-اما بقى تانى حاجه مضايقانى انى وبمناسبه مرور عام جديد من عمرى قعدت اقيم السنه دى

وللاسف الشديد جدا اكتئبت

ايه كميه الاخطاء الفظيعه دى

اخطاء عمرها ما وردت على حد

اخطاء عمرى ما كنت اتصور انى اقع فيها

حاسه انى كنت عاميه السنه دى

نفسى اعتذر لناس كتيره اوى قابلتهم واتعاملت معاهم السنه دى

بتكسف من نفسى كل اما اشوفهم لغايه انى بقيت اتمنى انى ماشوفهمش تانى

بتمنى من ربنا انهم يكونو مسامحنى

من الاخر سنه ضعت من عمرى بدل ما ادي فيها

كنت انا الى عائل على البشريه فيها

صغرت السنه دى كام سنه لورا بدل ما اطلع لقدام



3- تالت حاجه مضايقانى

فانا مضايقه من شباب من الاخوان كتير بيحسبو نفسهم بيعملو حاجات صح

لكن للاسف هيكتشفو بعدين انهم الى بيعملوه ده غلط

يعنى بسمع وبشوف تجاوزات كتيره اوى مش احنا الى نعملها

كنت عايزه انزل بوست عليها

بس بصيت لنفسى لقيت نفسى مليانه عيوب واخطاء

فقلت اتنيلى وصلحى نفسك الاول قبل اما تبصى لغيرك

وكمان مش انقد حد من باب النقد يعنى لازم انقد نقد بناء

ربنا المستعان واقدر اعمل حاجه



4- اما بقى رابع حاجه مضايقانى الهم الازلى الى مش هنخلص منه ابدا

الامه الاسلاميه الى بضيع وانا قاعده بتفرج عليها

يا فرحتك بنفسك يا سميه

نسيتى اخواتك ومش بتقدملهم اى حاجه

للاسف انشغلت بهمومى الشخصيه ونسيت ان فى فلسطين بتنادى

والعراق دلوقتى والبقيه تاتى

ايه الى قدمتيه

يا حسره عليكى

حتى الدعاء نسيتيه

اللهم احفظنا

بس كده هما دول الحاجات الى مضايقنى



طب هو انتى داخله تكلمى كده وخلاص طب يا بنتى ما تفكرى هتعملى ايه

اممممممممممم

طب نمسك حاجه حاجه


بالنسبه لرقم واحد المستقبل

1- هاركز فى اسلام اون لاين وسيبنى من عشرينات ان شالا محد حوش

2- هاخد ام الكورس الانجليزى الى مش راضى يتاخد ده

3- هاركز فى معهد القرن عشان اراجع القران الى نسيته وابطل تهريج بقى

4- هافكر واستخير فى العرض بتاع شروق وربنا المستعان



اما بقى رقم اتنين الى هو السنه الى فاتت

1-هاستغفر ربنا لان ربنا غفور رحيم (مع انى عملتها كتير والله)

2-هاتعلم من اخطائى وابص لايجابيات السنه الى فاتت

3- كفايه انى اتعرفت على اصدقاء عمرى ما هنساهم فى حياتى ابدا هما عارفين نفسهم 



اما رقم تلاته الى هما شباب الاخوان بنات وبنين

1-هحاول اعمل بحث عن الانفتاح الاسلامى يعنى ازاى ننفتح من غير تجاوزات

2-هاخد اراء وفتاوى ناس كبار

3-انزل حلقات مسلسله فى الموضوع ده

4- ادعولى متبقاش حماسه والسلام



اما بقى رقم اربعه الامه بتاعتنا

1-بجد ان شاء الله ناويه منساهمش من دعائى تانى

2-واحاول اتصدق ولو باليسير

3-واحاول اوصل القضيه عشان منسهاش تانى

بس كده انا كده ارتحت وخرجت الى فى قلبى



........................................................

ما ينفعش اقفل البوست ده من غير ما اشكر حبايبى وصحابى الى عمالولى احلى عيد ميلاد فى الدنيا على المنتدى

رحاب صاحبه مدونه رنين الصمت

وسميه صاحبه مدونه استوب هير بس بالانجليزى

وطبعا منساش جارتى وحبيبتى شروق الى طلعت قعدت معايا وانا مخنوقه واستحملتنى وعزمتنى على سندوتشات كده وكده

:D


 ومتنسونيش فى الدعاء بقى الله يكرمكم ومنجلكوش فى حاله اكتئاب ابدا


21 comments:

عاشقة الرحمن...سميه العريان said...

بعد ما خلصت التدوينه دى دخلت عند شروق لقيتها محتفله بيا

فحبيت بجد اشكرها على الاحتفال الرائع المهبب الى عملاهولى ده

بس بجد كفايه انها افتكرتنى


شكرا يا حبى يا شروق

عاشقة الرحمن...سميه العريان said...

بعد ما خلصت التدوينه دى دخلت عند شروق لقيتها محتفله بيا

فحبيت بجد اشكرها على الاحتفال الرائع المهبب الى عملاهولى ده

بس بجد كفايه انها افتكرتنى


شكرا يا حبى يا شروق

شروق الشواف said...

حبيبتي سميه

لازم الاول تفضحيني وتقولي انك انتي اللي عزماني لا وتتريقي كمان ....ده حتى حتت سندوتش كبده ...اجمل مافي ان انا وانتي عملين ناكل واسماء قاعده في النص بنا متغاظه ...

.............

طبعا بالنسبة للمضايقك

رغم انك مضايقة

لكن دي حاجه كويسه انك عارفه غطلك وبتحاولي تصلحيه [ وانتي دائما بتقوليلي الكلمه دي ]

لكن المشكلة اللي يعمل غلط وهو فاكر انه ميه ميه

دي بتبقى المصيبة فعلا

وانتي ذكرتيها

في شبابنا واخوتنا اللي بيعملوا تجاوزات احنا شفناها في الفتره الماضية بحجة الانفتاح و....و....و

.............
عموما ربنا ييسر
وفكري في عرضي كويس
..........

عاشقة الرحمن...سميه العريان said...

اوك يا حبى

انتى تامرينى

أحمد عبد الفتاح said...

الاخت سمية
كل سنة وانتي طسيبة وباتم صحة وسعاده
وعقبال 125سنة و 68 يوم وربع مش عارف اشمعني بس هو كده وخلاص
اما بقه لاولا فانا هقول لك امين ذي ما طلبتي بس ليه انتي فرضاي في اخر البوست انك لقيتي نفسك في الاعلام بالرغم من انك قلتي انك لسه مش عارفه في اوله ؟
خلي بالك لسه قدامك وقت وممكن ترجعي المهم تفكري
وبالنسبة لرقم 2 فلا تعليق فيها وربنا وفقك
أما بقه رقم 3 فانتي فكرتيني بموضوع مهم جدا
من سنتين ثلاثة كده كنت في رحلة عمرة مع 52 شاب من شباب المفروض انهم شباب الاخوان وحطيت ايدي في الرحلة ده علي مشكل كتير رجعت من العمرة وانا حاطط هدف ليا هو شباب الاخوان واعتقد اني اشتغلت فيه شوية بس الامر بجد صعب لان تركيبة شباب الاخوان تركيبة صعبة جدا
بصي يا سمية
أنتي قلتي
من شباب من الاخوان كتير بيحسبو نفسهم بيعملو حاجات صح

لكن للاسف هيكتشفو بعدين انهم الى بيعملوه ده غلط

يعنى بسمع وبشوف تجاوزات كتيره اوى مش احنا الى نعملها
طيب هما عملوا وجربوا
أما انتي فمعملتيش اكتفيتي بالمراقبة
شباب الاخوان مش ملايكة ومش منزهين دول بني ادمين ولازم يغلطو المهم يتعلموا المصيبة في الي ميعملش عشان هو خايف من الخطأ
نصيحتي ليكي
الموضوع مش يتحل بالبوستات
الموضوع يتحل بالاحتكاك المباشر
وان كان مفيش مانع طبعا تكتبي
أما بقه الامة الاسلامية فلها الله ثم شباب بيفكروا فيها
واكرر تهنئتي
كل سنة وانتي أفضل من التي قبلها

همسة قلم said...

ايه الحلاوة دي

سمية انتي لسه 21 سنة
يافرحتي بيكي ياحبيبتي ... طيب كل سنة وانتي طيبة ويارب دايما في خير وطاعة ياسمسمة :)

Anonymous said...

حبيبتى سمية

كل عام وانت الى الله اقرب يا سمياية

شفت الموضوع عند شروق و عندك وكان لازم انزل فقلت أرد فين

قلت عند صاحبة اليوم وبعدين لقيت اصلا ان هنا او هنا فى بيتها..

فانتم الاتنين هرد عليكم هنا

أولا ربنا يباركلكم فى اخوتكم وتكون دوما كل واحدة فيكم مرأة للأخرى ترى فيها نفسها بمميزاتها ومواطن القصور فيها..وتفضلوا كده ان شاء الله حتى تجمعكم الجنة..واحنا معاكم بردو

وعموما اخوتكم دى بتتحي يعنى لما شفتكم حسيت بيها واتبسطت..

نيجى باه للناس المتفاءلة والسعيدة واللى مش نكدية..هه يا سمية
اللى بتتكلم عن يوم ميلادها

انا طبعا بهزر ومقتنعة جدا ان يوم ميلادنا ده هوه جرس تنبيه انه فات منك سنة شوف عملت فيها ايه وناوى تعمل ايييييه؟؟

اما بالنسبة لتعليقى على اللى مدايقك فدى محتاجة أعدة
لانى دلوقتى نازلة الكلية
واحدة بتدرس وتتعب عشان لقمة العيش

مش متخرجة ولا هممها

يلا أرزاق :(

كش ملك said...

السلام عليكم ورحمة الله وبركاتة..

انا قرءت البوست وفعلا جميل اوى ز.انا مش هعقب علية ولكنى هعقب على أحساسى..

المهم انا كنت كدة الأول كنت حاسس انى ضايع مش لاقى حاجة أعملها خالص غير انى اخرج من الجامعة اروح البيت ومن البيت الى الجامعة وهكذا مفيش حاجة غير كدة..

لحد محسيت ان حياتى كلها بضيع هدر ومفيش اى حاجة بعملها .. فقررت انى أقف وقفة مع نفسى شوية ..

وبدءت اجيب ورقة وقلم .. وفعلا حطيت اهداف لية فى الأجل القصير والمتوسط والطويل

يعنى محطتش الاهداف كدة وخلاص لأحددت وقت معاة ..

عشان نقدر نحقق اهدفنا مينفعش نضع اهداف كتير واعملها مع بعض كلها ..

لأ انا لا أنصح بهذا ولكنى أفضل ان أضع هدف وأحدد لة وقت وخلال الوقت دة أكون خلصت الهدف دة علشان أنقل على هدف تانى خالص وهكذا ..


يعنى مثلا ممكن يكون هدفى كلوأتى أخد كورس وحدد الوقت اللى هيخلص فية الكورس .. وبعد ميخلص خلاص وأكون انجزت فية حلو اوى اوى ز.. أنقل على الهدف التانى .. ولا يمنع إنى أخد هدف أخر مع الهدف دة أعملة مع بعض ولكن لا يكتروا عن هدفين وإذا هيئثروا على بعض ألغى هدف وأسيب هدف واحد ..





الحاجة المهمة اللى عاوز انبه فية فى الأخر ..


متركزيش على أخطاء غيرك ركزى على أخطائكا نتى .. هاتى ورقة وأقلم معاكى على طول وانتى ماشية فى كلة حتة وفى كل مشوار ..

وأبدئى اكتبى عيوبك فى المشوار دة .. يعنى مثلا وقفت أتكلمت كتيير فى كلام ملهوش لازمة وضيعت الوقت لا انا هبدء معملش كدة .. بدءت أنم كتييير وهكذا


بكدة هتقضى على عيوبك ..



والحاجة الأخيرة اللى أقدر أقولك تخلى بالك منها اوى اوى اوى ..




الوقت .. يعنى أخلى بالى من الوقت اوى اوى ز.. لو فى حجات هضيع وقتى كتيييييييييير منى أتخلص منها ...



يعنى مرغيش كتيييير فى التليفون .. أبدء أخلص مشاويرى وأعمل حجات تانية مفيدة ..


ذى مثلا لية متفقش مع جامع بعد صلاة العصر او أى صلاة إنى أشرح حكم أبن عطاء منها أستفيد وأفيد وأتصاحب على ناس تانية كويسة وهكذا



فى الأخر انا اسف لو كنت طولت .. بس الإنسان عموما لازم يراجع نفسة بأستمرار مش من السنة لسنة .. ولكن من اليوم لليوم عشان نتأكد ان يومنا مضعش كدة ..


وجزاكى الله خير

حارة سد said...

السلام عليكم ....يا أسخت سميه مش عارف ليه عفوا يعني في الكلمه بتنظري للشيء نره فيها شؤم أو نوع من او التقفيل يعني دايما بتحملي نفسك اخطاء او بتبصي للامور بصه سودادويه ...هو مفيش اختلاف ان احنا لازم نبص ونحاول نصحح اخطائنا بس برضه على قدر من التفائل وقدر من الحياديه في الحكم على نفسنا عشان الحياه والدنيا تستمر

sharkawoo said...

كل عام وأنتم إلي الله أقرب ...دائماً حين يتكلم أي أحد معي عن الأحلام أري أن تلك الأحلام أو الأمنيات أو الأهداف مهما كانت كبيرة ما هي إلا مجموعة من الخطوات قد تكون أصعب مشكلة في البداية وبعدها يفتح الله علينا ... لكن أهم حاجة أن الواحد يبدأ ..

ربنا يعينكم ويثبتكم إن شاء الله

cleopatra said...

الحمد لله ...

محمود سعيد said...

بما أن انا كمان يوم ميلادى أزفت ذكراه
اللى ممكن تخلينى أتضايق علشان انا ممكن اكتب زى اللى كتبتيه فى 1 و 2 و 4


بس انا هاقول لنفسى من تدخل فيما لا يعنيه .........

يبقى أتدخل بقى فيما يعنينى وأقول أن النقطة الثالثة ديه لازم تقولى لنا رأيك فيهاومستنيين نسمعه :-)


وطبعاً طبعاً كل سنة وانتى طيبة

آلاء الرحـمـن said...


كل سنه و انتى طيبة يا سمسمه

نص الاخوات عيد ميلادهم يوم 15-5

ساره بشر و يسرا عبد المنعم
و انتى

فقررنا منجبش هدايا لحد :P

ربنا يسعدك يا سمسم

و ان شاء الله تحققى كل اللى بتتمنيه

عاشقة الرحمن...سميه العريان said...

الاستاذ احمد عبد الفتاح

اولا وحضرتك طيب بس تقريبا حضرتك فهمت بعض اجزاء الحديث غلط

انا اقصد باسلام اون لاين مشاكل وحلول الى هو مجال تخصصى والى هسيبه هو عملى الصحفى لعدم توافقى معه

ثانيا كلامى عن شباب الاخوان هو من الاحتكاك المباشر وليس المراقبه فقط

ثانيا انا لم انفى عن نفسى الخطا لاننا كلنا بنغلط بس الحمد لله اعترفت انى اخطات وربنا من عليا بانى اصلح اخطائى دى

وانا مقلتش للناس متغلتش لكن اهم حاجه انهم يعترفو انهم اخطاو مش يدافعو عن الخطا ده بتبريرات وخلاص

يعنى المهم انهم يصلحو الخطا ده وده مش هيحصل الا بالاعتراف به اولا

.............

اسموءه حبيبتى نورتينى

وانتى طيبه يا قمره

..........

سمسومه برده

وانتى طيبه يا رب

مستنياكى تخلصى امتحانات عشان خططنا الجباره :)

...............

الاستاذ محمد

وحضرتك طيب
وان شاء الله هاخد بنصيحتك وهاراجع نفسى اول باول

ومن ناحيه اخطاء غيرى فانا لا انفى انى مليئه بالاخطاء

لكن الايجابيه تحتم عليا برده انى انصح لله
والدين النصيحه

جزاك الله خيرا

..........

الاخ محمد شاكر

جزاك الله خيرا على الرد

بس انا لا ارى انى انظر للموضوع بتشاؤم اوى كده

انا بس مش راضيه عن نفسى ونفسى ابقى احسن من كده عشان ربنا يرضى عنى

وانا مقفلتش البوست الا وحطيت لنفسى خطوات عمليه عشان ميبقاش كلام من غير فايده

..........

الاخ شارقاوى

وحضرتك طيب

والحمد لله ابتديت فى كام حاجه من الى كتبتهم

المهم دلوقتى انى استمر

............

كوكو

الحمد لله ياستى

بس هو ده الى ربنا قدرك عليه
متقطعيش الجوابات

...............

الاخ محمود سعيد

بالنسبه للنقطه التالته فانا ان شاء الله احاول اختيار الكلمات المناسبه حتى تصبح نصيحه ونقد بناء وليس هدام

اول ما اوصل للصياغه المناسبه والحلول المقترحه هنزل البوست

وان شاء الله يكون قريبا

.........

الاء حبيبتى

مكنت اعرف انك اخت ايه غير من يومين بس

نورتى المدونه

وانتى طيبه يا حبيبتى

وعلى فكره بقى الشهر ده شهر العظماء بلا فخر
:)

قلب أبيــض said...

السلام عليكم
اولا كل سنة وحضرتك طيبة
ثانيا البوست جميل
ثاثا مفيش حاجة فى الدنيا مستاهلة رابعا السلام عليكم

اسماء العريــان said...

كل سنه وانتى طيبه يا سمااااااااسم

وعقبال ما تتجوزى ونخلص منك بقى .. رغم انك مش هتبعدى كتير هتطلعى الدور الى فوقيا بس .. عايزة استولى على الكمبيوتر والبيت لوحدى

وبعدين انا لسه عند وعدى فى انى اعملك بوست بس خليه بعد الامتحانات عشان امخمخ فيه

مشروع انسان said...

اولا نقول الحمد لله ان بيذكرنا بنفسنا ونفتكر اننا نحاسب نفسنا والحمد لله
بس كويس ان الواحد يعرف اخطائه عشان يصلحها بعد كده بس المهم البداية كم من اخطاء ومشاكل يريد المرء ان يغيرها ولكن تحجزه نفسه الامارة بالسوء عنها اللهم خذ بناصيتنا اليك
وحكاية النقد فهو مطلوب حتى اذا كنت انا نفسى مش اهل للنقد مادام نقد هادئ ومحترم وبناء وبالنسبة للامة فالواحد فعلا مش لازم تشغله الامور الداخلية بالامور العظمى هدانا الله وغفر لنا

Rehab Saber said...

ربنا يعزك يارب
ويهديكى ويهدينا

ويصلح الحال

Anonymous said...

كل سنة وانتى طيبة

وتستمر الحياة يا أخت سمية

دمتى بكل خير وحب وتقدير

سلام

Anonymous said...

بصي يا سميه


انا كتبت تعليق كبيييييييييير ومنزلش لان الباور فصل

هكتب بعضا منه


اول حاجه قلت اني بحبك وبموتن فيكي وانتي متعرفنيش ودي اول مره اعلق على تدوينه ليكي بس بحس انك قريبه من قلبي جدا وحاسه اني بغلس و بحشر نفسي واعمل نفسي صاحبتك كده من غير سابق انذار


وقلت اني كمان يوم ميلادي 28 يونيو
وهكمل عشرين سنه يعني قرب وبرده في نفس حالة الاكتئاب على ماضاع ومالم يحقق ومااقترف من اخطاء

وطلبت منك انك تتمسكي بحماسك وتحققي اهدافك علشان تديني الامل اننا في
العام الجديد ده هنتغير ونغير
ويبقى العام ده افضل واجمل ونكون اقرب لله فيه ان شاء الله

ارجوكي اوعي تفقدي حماسك علشان معلمش زيك اديني دفعه وامل

و عندي حاجات كتيييييييير جدااااااااا نفسي اكلمك فيها بس للاسف الوقت ميسمحش دلوقت والى ان تحين الظروف

لكي مني كل الحب والاحترام

وسنه حلوه ياجميل


اختك


دعوة الفردوس

ahmad fawzy said...

يا جماعة انا عاوز حد يرد علي الأسئلة بتاعتي من فضلكم ممكن