اليوم يصادف يوم ميلاد ابى هيتم ال53 سنه....عقبال عندكم
وبهذه المناسبه السعيده قلت اكتب عن لمحات فى حياه ابى
اولا : نشأته
نشأ ابى فى بلده ناهيا بالجيزه وهى بلده ريفيه بس اهلها طيبين اوى
مات جدى الى هو والده عندما بلغ ابى ال6 سنين يعنى بابا اتربى يتيم الاب
وكان هو اصغر اولاده ويعتبر عمى الاكبر هو الى مربيه
كانت الهوايه المعروفه لابى فى الصغر والى الان هى القراءه
كان بيحوش مصروفه ويروح المدرسه مشى عشان يشترى كتب يقراءها
ثانيا : تعليمه
الصراحه انا مش عارفه بابا بيحب العلم اوى كده ازاى
يعنى هو فى الاول متخرج من طب القاهره
وبعدين اخد ليسانس الحقوق وهو عضو مجلس شعب وده عشان يتكلم فى المجلس عن علم
وبعدين اخد شريعه ازهر بتقدير امتياز
ومعاها اخد ليسانس اداب تاريخ بتقدير جيد جدا
واخر شهادتين اخدهم وهو فى سجن المزرعه لما كان محكوم عليه بخمس سنين
وكان بدا فى معهد القراءات بس لانشغاله لما خرج من السجن مقدرش يكمل فيه
ثالثا : حياته معانا
مش قادره انسى اللقاء اليومى الى كان بابا بيعمله معانا بعد الفجر يوميا وده كان قبل اعتقال 95 يعنى كنت صغيره
كل الى افتكره دعاء شروق الشمس الى كنا بيحفظهولنا يوميا
اما بقى الخمس سنين بتوع المزرعه
كانت طريقه التواصل بينا وبين بابا الجوابات
مكنش بيفوت مناسبه ولو صغيره الا ولازم يبعت ليها جواب
بدايه الدراسه والهجره والمولد وعمليه الزايده الى عملتها
يااااااه...مش قادره انسى جوابات قبل الامتحان .....كان بيعملى جدول كل ترم اذاكر كل ماده ازاى وجدول لتنظيم وقتى
مفيش مناسبه الا ولازم يبعت جواب
لما خرج بقى....كانت ايام الامتحانات دى بعيش ملكه فى البيت...بابا كان لازم يعملى القهوه والفطار الصبح بعد الفجر عشان يشجعنى على المذاكره
ولو مش فاهمه حاجه يحاول يقرأها معايا ويشرحهالى
ولا الجلسه الاسبوعيه الى كنا بنقعدها بعد ما خرج من الخمس سنين كانت حكايه
كانت الفقره الاساسيه فيها حكم بن عطاء الله
كان بيشرحهالنا ويخلينا نحفظها ويعملنا فيها مسابقه
بجد كانت ايام حلوه اوى ...للاسف مش بنقدر نقعد القاعده دى دلوقتى ..بسبب مشغولياتنا كلنا ...بس بجد هحاول ارجعها تانى
رابعا : بابا مع نفسه
بابا عنده طقوس يوميه لا يمكن لاحد المساس بها اطلاقا
اولا يصحى الفجر او قبل الفجر بشويه ....يصلى
وبعدين يطلع من المسجد ...لابد من فنجان القهوه الصباحى مع فصين طوم مع 7 تمرات على السنه
وبعدين ينزل يتمشى ساعه تقريبا واذاعه لندن فى ودنه والسبحه فى ايده ولسانه مع اذكار الصباح
وهو راجع من المشى لازم يكون هناك وقفه عند الراجل بتاع الجرايد...ياخد جوله سريعه على الجرايد كلها وهو واقف
وبعدين يطلع ياخد الدش بتاعه
وبيكتب ما يفتح الله به عليه من مقالات وابحاث
ويروح المكتب والنقابه وباقى مشغولياته
وبيرجع غالبا بعد الظهر يتغدى وينام ويصحى ياخد الفنجان التانى والجنزبيل واحيانا الشاى الاخضر
وبعدين يتفرج على الجزيره والبي بي سي والسى ان ان
يعنى وكالات الانباء كلها
ونظره على الجرايد تانى كلها بس المره دى بتمعن
ولازم يقرا فى الحكم كل يوم ...عشان بيشرحها للناس بعد الفجر
حكايه بابا مع الحكم دى هعملها تدوينه خاصه
بس بجد انا بفتخر ان الراجل ده بابايا
كان نفسى احكى اكتر من كده كتير
بس الحكاوى مش هتخلص عليه
لو قدرت ممكن اعمله تدوينه تانيه
وفى الاخر بدعيله
كل عام وانت الى اقرب وعلى طاعته ادوم وللجنه اقرب وللنار ابعد وللقران احفظ وللرسول اتبع
27 comments:
ربنا يحفظه يارب
كل عام وحضرتك الى الله اقرب
متنسيش الهدية يا سمسمة بقى
تابعت الكلام وانا أتأمل مشهده ..
وبين الفينة والفينة أقف قائلا
ما شاء الله لا قوة إلا بالله
هذا رجل يستحق أن يكون فعلا من الخوان المسلمين ..
سمعت منه ذات مرة كلامه عن حكم بن عطاء الله السكندري
واوصاني يوما بكتاب يشرحه وحدثني إبراهيم أنه يشرحها يوميا - في فترة وجوده خارج السجن بالطبع - بعد صلاة الفجر في المسجد
حكم زلال بالفعل وبها معان كثيرة ليست في غيرها
أختي ..
حفظ الله أباكم وزاده بسطة في العلم والأدب .. وأبقاه رجلا يحمل الحق ويجاهد به ورضي الله عنا وعنه ..
... مزاجات
كل عام وأستاذنا الدكتور عصام بخير ...
ربنا يعينه ويقعد خارج الأسوار أكثر من المتوقع ...
ويعينه علي ما يحملع علي عاتقه ...
كل سنه وانت فرحان بيادايما يا بابا ... كفايه انك عند بنت زيي
بس يا سميه نسيتى حاجه .. ان بابا بيشرب قهوة عربى قبل ما ياخد الدش
ونسيتى الفطار .. الى كل يوم بيصحيكى عشان تعمليه
كل سنة والدكتور عصام وكل الأسرة بكل خير
بس أول مرة أعرف أن الدكتور مهتم بحكم ابن عطاء الله السكندرى كده
مع أنى مقرأتهاش كلها
لكنها من يعنى أجمل الكلمات اللى باحبها
حتى أول ما عملت المدونة كنت كل يوم ولا حاجة انزل منها حاجة مناسبة للى عاوز أقوله لنفسى
بس أستفدنا الصراحة أننا عرفنا أن أسلوب الوالد مع أبنائة (كأخ مع أبنائه) هو أسلوب أنه بيشتغل بإيده
يعنى بيعمل معاكم شغل (دعوة يعنى)
والجلسة الأسبوعية
مبيتكلش على غيره :-)
السلام عليكم
يعلم الله وحده مقدار حبي العميق للدكترو عصام العريان
فحبي له والله لا يحكيه لسان ولا يكتبه قلم ولا تعبر عنه جوارح
ووالله كلما رايته ينشرح صدري واحب ان أتامله وللاسف الشديد هو لا يعرفني ولكني اتحسس وابحث عن اي مكان هو يذهب اليه لاذهب ورائه واسمع آرائه
ووصل الامر لدرجة انني في كليتي كلية الاعلام جلست أحدث زملائي عنه وعن جهاده وعن دعوته في الجماعه
وكان ذلك في اخدى مناقشاتي لاحدى الابحاث المطلوبه حول الاعلام والسياسه مما جعل الاستاذه الجامعيه توقفني وتقول هل هو بحث عن عصام العريان ام عن الاعلام السياسه؟!!!
ولكم أتمنى ان اراه قريبا وان استمع اليه
ولا استطيع ان اخبىء حسدي انكن بناته ...حفظه الله لكم وحفظكن له
وكل عام وهو الى الله أقرب
ما شاء الله
هو ان بس هعلق على حاجة مهمة اوي
وهي إن ما شاء الله
كل العطاء ده
وكل التاريخ ده
والدكتور عصام 53 سنة
بصراحة نموذج يسجل كعلامة بارزة في تاريخ الإخوان
محمد حمزة
يعلم الله انى احب الدكتور عصام فى الله
وانى بجد
كل مقعد اسمعه فى موتمر او شرح لدرس من دروسه او لقاء
مبقدرش
غير انى اتاثر بيه جدا
انا فاكر اول مره
اسقف بحاراه على حد اتكلم فى موتمر كان الدكتور عصام
مع انى مش من الناس اللى بتسقف وخلاص
بجد
كان قبل ميتاخد ايام مظاهرات الاصلاح
وكان كلامه رائع
وربنا يهنيكو بيه
ويفضل بره اكتر من جوه
هو ده النموذج والقدوه
وسلاااااااااام
في حفلة تخرج دفعتي من النقابة.....كان كل همي اني اشوف الدكتور عصام العريان لحبي الشديد له....وكان قاعد في المنصة بس بردو بعيد عايز اسلم عليه....جه وقت صلاة الجمعة خرجنا نصلي ف الجامع....بتلفت لقيته جنبي قلت والله فرصة مانيش ماشي غير لما اسلم عليه واكلمه.....كنت خايف ليقابل عاطفتي دي بنوع من اللا مبالاة كما يحدث من بعض المشهورين....الا اني فوجئت بحرارة سلامه وتواضعة الشديد....وعندما اثنيت عليه رد قائلا استغفر الله استغفر الله.....سألته لو اناعايز اتثقف سياسيا قاللي احرص علي سماع البي بي سي
وطبعا اتصورنا معاه انا والاخوة
كل سنة وانت عظيم يا دكتور عصام
ثبتك الله علي الحق
وجعلك سيفا مسلطا علي الظالمين
كل عام وحضرتك بخير يا دكتورنا ويا استاذنا وحاجات كتير كده
بس 53 سنة لسة صغير .. عقبال الـ 80
ليس الفتى من قال كان أبي
ولكن الفتى من قال ها أنا ذا
كل سنة وهو الى الله أقرب
كل سنة ووالدنا الغالي الي الله اقرب
ربنا يبارك فيه...و انا شغال فى الاى ار تى زمان كانوا معدين البرامج هناك بيتهافتوا على انهم يستضيفوه فى البرامج السياسية زى الدكتور ايمان جمعة و غيرهالما له من علم و تركيز و سيطرة على وقتة المتاح ...بيدى كبسولات ..ربنا يباركله و يتقبل منه
ربنا معاه ويوفقه فى دنياه واخرته
انا فى بكالريوس تجاره وكنت ناوى ادخل حقوق بعدها
ولك ان تتخيلى كم الإحباط من اسرتى واصدقائى حتى لا ادخل تلك الكلية
ويقعدوا يقولو هوه العمر فى كام سنه علشان تقضيه فى الجامعه
بتهيألى الدكتور عصام العريان مثال رائع على العلم
إلى من أحبته قلوبنا
إلى من ارتوت من فكره عقولنا
إلى من ألفته وأنست به أروحنا
نحبك في الله من عميق قلوبنا وعقولنا وأرواحنا
ألف شكررررررررررررررر بنت الإسلام هكذا القدوة ويا ريت تكلي لينا حكايات ورويات ويوميات هذا الرجل العظيم لنتعلم منه ونقتدي به
أبلغيه سلااااااااااااااااما خاصامني في يوم مولده ... أسعد الله جميع أيامه
اولا :بشكر الجميع على تعليقاته
بس انا هارد رد خاص لفرد الذى لم يذكر اسمه
اولا :جزاك الله خيرا على التذكره وادعو لى ان يرضى الله عنى
ثانيا : هى حاجه كنت هكتبها فى البوست بس ترددت
وهو انى كاتبه البوست ده لنفسى قبل اى حد تانى
وده لانى كتير كنت بظلم بابا فى حاجات كتير اوى و بجد مكنتش راضيه عن ظهوره فى التليفزيون والكلام ده
بس كل ما اقرب منه الاقى نفسى مش مقدراه خالص
يعنى الناس كلها مقدره الراجل الا انا حتى وهو فى المعتقل لم اقدم ليه اى حاجه
ويمكن الى حاسسنى بالذنب اكتر انه من يوم كده او يومين زعقلى قبل ما ينزل الصبح على حاجه غلط فيها وبعد ما خرج بشويه لقيته بيتصل بيا على الموبايل ويقولى سامحينى يا سميه انا مكنش قصدى ازعقلك بجد اتاثرت اوى
يعنى هو من حقه يزعقلى ومع ذلك اتصل يعتذرلى وكمان مستناش يرجع البيت ويصالحنى بانه يبدا معايا كلام وخلاص
بجد اتاثرت اوى وحسيت انى مش عارفه بابا ومش عايزه اقرب منه وعشان كده قعدت افتكر بابا ده ايه وبس
وشكرا
:) ربنا يكرمو بيكو وتكونو اكثر الأسباب بتجلبلو السعاده في الدنيا
فعلا عمرنا ببنقدر تعبهم عشانا .. ودة انا بعملة بردة
سعات كتير بيزعقلى وانا بكون مخنوق أوى وفى الأخر بيكون هو الصح وانا الغلط
الحمد لله
ربنا يخليه ليكم يا رب ويحميه وياريت تكتبى لينا اكتر عنه عشان نستفيد اكيد الشخصيات البارزة دى ليها طقوس مختلفة عن اى حد يا بختكم بيه حافظوا عليه بقى ومتزعلهوش
جزاكى الله خيرا
كل سنه و عمو عصام طيب
ربنا يبارك فيه و في عمره يا رب
بجد أتأثرت أوى من الكلام اللى انتى كاتباه عن عمو و اتأثرت اكتر بردك اللى فات
بجد ربنا يخيلكو لبعض
سلاامنا لعمو ..
تدوينة رائعة لأنها تتحدث عن شخصية رائعة
كل عام وهو إلى الله أقرب وعلى طاعته أدوم وللإسلام ولدعوته أنفع
دائما أنا متأخر .. كان عندي بعض الظروف ولم أستطع متابعتكم
وفقكم الله
كل عام وانت ان شاء الله بخير
وربنا يعطيك العافيه
لقد تاثرت كثيرا والله بكلماتك وبصراحه بحسدك حسد غبطه وسرور ولقد زاد حبى اكثر عندما زرت هذه المدونه بالصدفه والدكتور عصام العريان من افضل الناس عندى واللى بحيب استمع لهم جيدا خاصه لما بيصتضفوه فى القنوات الفضائيه تبهرنى بلاغته واسلوبه العذب وعقله الحاضر دائما
وفعلا ربنا يوفقه يارب ويبعد عنه ولاد قراقوش
يحشر المرء مع من أحب
اسال الله ان يحشرنى مع الدكتور عصام
و يجمعنى به فى الفردوس الاعلى يا رب
نسأل الله أن يحفظه ويفتح على ايده ويد إخوانه .
الطارق - الكويت
http://www.altariq2009.com/
كل تحية وتقدير
لرجل
قل ان يجود الزمان بمثله
لقد قرات سيرة الدكتور من زمن بعييييد
ومن يوميها
وانا اكن له كل تقدير واحترام
ولك ولاختك واخوانك التحية
Post a Comment