رجل رقيق القلب

كنت قد كتبت فى تدوينتى السابقه عن ابى الذى هو الغائب الحاضر

ولكن عند زيارتى له يوم السبت فى النيابه لفت نظرى احد الاخوه الكبار فى السن والمقام كنت اول مره اقابله فى حياته

انه عمو نبيل مقبل .....رجل رقيق القلب...بشوش دائما

عندما قابلنا فى النيانه سلم علينا وهو يضحك ويقول انا قد جدكم

لم يكن يبالى بشىء الا بزوجته المريضه التى قاربت على السبعين

انسان متواضع جدا

ذكرنى بصحابه رسول الله عندما ذهبوا اليه ليخرجو معه فى الغزو وهو لا يجد ما يحملهم عليه

فيرجعوا واعينهم تفيض من الدمع

هكذا كان حاله عندما يسمع عن اعتقال مجموعه من الاخوان وهو لا يستطيع ان يمد اليهم يد المساعده

فكان يبكى لحال اخوانه

فهل لنا ان نبكى لحاله

حسبنا الله ونعم الوكيل

بسم الله الرحمن الرحيم

مش عارفه ابدا الكلام منين

كنت لسه من ايام معدوده بفتح جوابات بابا الى كان بيبعتهالى وهو فى المعتقل ايام الخمس سنين

كنت ساعتها فى رابعه ابتدائى وخرج وانا فى ثانوى

كان بيكتبلى جواب فى كل مناسبه

قبل الامتحانات .....يحطلى جدول ويقولى ازاى اذاكر وازاى انظم وقتى فى الامتحانات

كان بيبعتلى جواب فى كل مناسبه دينيه زى الهجره والمولد ورمضان وينصحنى ازاى استغل المناسبه دى فى طاعه المولى

فى العيد كان بكتبلى ازاى ادخر فلوسى واخرج منها جزء للصدقه

عملت عمليه الزايده...ساعتها بعتلى جواب يقولى  انه كان نفسه يبقى جمبى ساعتها وانه بيدعيلى دايما

ولا انسى ابدا القصص الى كان بيجبهالنا...كنا فى الزياره نقرا القصص ونسيبه مع ماما

كانو بيسمونا اسره مثقفه

بجد يا بابا حتى وانت بعيد بتبقى معانا بروحك فى البيت

عمرك ماحسستنا انك بعيد عنا

انت مش معانا بجسدك بس معانا بروحك ونصايحك الدايمه

ويارب اجعل هذه الحبسه فى ميزان حسناتك وحسناتنا

اللهم رضينا واياك

وانزل السكينه على قلوبنا

واربط على قلوبنا وثبتنا ياعزيز يا رحيم

معلش الكلام متلخبط بس انا مرتبتش الكلام وسبته يخرج كده

سامحونى

وماذا بعد الذكريات

كنت قد كتبت فى تدوينه سابقه عن الذكريات والمواقف التى مر الانسان بها....تكلمت عن اختلافها من حيث مضمونها فمنها السعيد ومنها الحزين و......................الخ

ولكن.................هل تتوقف الذكريات عن كونها ذكريات ام انها تتطور معنا لتصبح اكبر من كونها ذكريات؟؟؟؟؟؟؟؟؟

اذا نظرنا لمجموع ذكرياتنا مضروبه فى بعضها ...نجد ان تلك الذكريات اكبر بكثير من كونها ذكريات

فلو نظرنا لانفسنا نجد كيف ىساهمت كل تلك المواقف والاوقات السعيده والحزينه والعصيبه من تشكيلنا من جهات عديده

التفكير....نظرتنا الى انفسنا...اكتشاف انفسنا....ثقتنا بانفسنا...تصرفنا مع غيرنا...اتجاهاتنا...زمبادئنا....اعتقادتنا

كل هذا كان نتاج المواقف التى مررنا بها

مع العلم ان لكل واحد منا تطوره الخاص

واعنى بذلك اننى لو عشت ذكريات غيرى فلن اصبح مثله ....لان لكل واحد منا سماته الشخصيه التى تعالج تلك الذكريات بما يناسبها

وذلك ما كنت اعنى به اختلاف ردود افعالنا فى تدوينتى السابقه

ولعل الكثيرين يتسائلون لماذا اكتب عن هذا التطور الذى هو نتاج الذكريات...ما الفائده من هذه التدوينه؟؟؟؟

احببت فقط ان اشارككم فيما يجول فى عقلى من افكار ولربما انتفع البعض مما انتفعت به عندما جال فى خاطرى تلك الافكار

فقد تذكرت فى لحظه صفاء مع نفسى كم من الذكريات لم اكن اتوقع ان اكون انا هى بطله تلك الذكريات

لا لشىء الا للاختلاف الكبير بينى وبين تلك الذكريات

فاخذت احلل تلك الذكريات الى ان وصلت الى انها هى من شكلتنى الان

فحمدت الله كثيرا عن ان هدانى لمعالجه تلك المواقف والذكريات فى طريق التطور السليم ...وليس تطور يطيح بى الى انتكاس بدلا من تطور

كما استغفرت ربى على ذنوب ومعاصى منها ما هو قريب ومنها ما هو بعيد يكاد لا يذكر....كى تظل صفحتى بيضاء

واخييرا.....فليتذكر كلا منا انه سيقف وياخذ صحيفته يوم القيامه...مكتوبا فيها كل صغيره وكبيره

فاقرا صحيفتك الان....واختر اتجاه تطورك

وقريبا ان شاء الرحمن...اكتب عن تطورى الذاتى خاصه فى مسار تفكيرى

اعتذار

اعتذر لتاخرى عليكم اولا

واعتذر ثانيا انى مش هقدر اكتب تدوينتى دلوقتى وده لانى مشغوله جدا بالتحضير لسفرى غدا الى بيت الله الحرام

ارجو ان تدعو لى بان يتقبل الله منى ويجعلها عمره فى ميزان حسناتى 

ان شاء الله ارجعلكم بعد 10 ايام      

ذكريات لا تنسى

كل يوم بيمر علينا بيمر فيه مواقف واحيانا طرائف واحيانا اخرى غرائب

منها ما يضحكنا ومنها ما يبكينا.......وتبقى لتظل ذكريات لا ننسى

مرت علينا مواقف ندمنا عليها وتمنينا لو ان هناك اله زمن تعيدنا كى نتصرف كما ينبغى.. لا كما تصرفنا

مرت علينا مواقف اخطانا بها لكن تعلمنا منها فكانت بمثابه طفره فى حياتنا

مرت علينا مواقف لم نصدق فيها اننا نحن لما كان وقتها من تصرف حكيم لم نكن نتوقع ان يصدر عنا...فازداد بعدها ثقتنا فى انفسنا...فاصبح خطوه للامام

مرت علينا لحظات ضعف ...اقسمنا بعدها ان لا تعود...لكن من المقدر دائما عودتها

مرت علينا لحظات قوه..تمنيناها ان تستمر الى نهايه العمر...لكن هل هذا من المعقول

مرت علينا لحظات ظلم ....فكانت تطهير للنفس وكانت علامه فى تشكيل حياتنا بعدها

ومرت علينا ايضا كنا نحن من يظلم...لكن يفيق الانسان منها سريعا بفضل اخوانه

مرت ومرت..........................

كل منا مر بكل تلك اللحظات......ولكن اختلف ردود الافعال

انتظروو تدوينتى القادمه

كل سنه وهي طيبه

هتقولولى بتاع مين الدبدوب ده...هقولكو ده هديه...هتقولولى ايه ده هديه.....هديه ايه دى.....دى هديه عيد ميلاد واحده حبيبتى اوى

ودى بقى التورته بتاعتها....طب هى مين طيب

ودى تورته تانيه على حسابى

لو جمعتو الشموع الى هنا مع الى فوق هنوصل هى تمت كام سنه

ده بقى الشو والزينه بتاعه الحفله برده على حسابى .....عشان متقولش حرمتها من حاجه

دى بقى بما ان حبايبها كتير والتورت الى فوق مش مقضيه...اضطريت انى اكلف نفسى فلوس زياده شويه واجيب تورته تالته

اياكى يا شروق تطالبينى باى هديه بعد كده....الناس شاهده انا اتكلفت قد ايه عشانك

كل سنه وانتى طيبه يا شروق....والله وكبرتى وتميتى ال22 سنه ...عقبالنا يا رب

عدنا اليكم من جديد

اعتذر اولا عن الانقطاع الطويل ده بس اكيد انتم عذرينى هحاول انتظم فى الكتابه مع علمى بصعوبه ذلك

وعاد زمن المعجزات

اولا احب ان اعبر عن انبهارى ودهشتى بتلك المعجزه التى كان ينتظرها بيتنا بامل ضعيف الا وهو نجاح اختى وانتقالها الى السنه الثانيه
مبروك يا سمسمتى ويا رب تكملى المعجزات وتحققى املى الى معرفتش احققه فى هذا القسم العتيق

شروق حبيبتى

حبيت بس اعبرلك عن حبى ليكى وفى نفس الوقت عن اسفى الشديد لقراركم بالابتعاد عنا بس بجد كانت ايام حلوه اوى الى قضيناها مع بعض وخاصه تلك التى شملتنا فى مكتبه منزلنا المتواضعه ايام الامتحانات وبجد لقيت فيكى خير اجت وصديق وقفتى جمبى كتير اوى ياريت بجد متنسينيش لما تعزلى ومتقطعيش الجوابات

كات وكوكو



مبرووووووووووووووووك النجاح بجد كنت قلقانه عليكو لما عرفت ان النتيجه طلعت ومصر مضلمه من غيركم .....منتظراكم مع فارغ الصبر

دى حاجات سريعه كده ولى عوده قريبه ان شاء الله

زواجي

من شروق حبيبتك

اولا انا بعتذرلكم جدا عن تأخر ي في الكتابة.... بس فعلا كنت مشغوله جدا

كنت عايزه اكتب في كذا موضوع اهمهم

1- فلسطين وحماس وحثيثيات الموقف

2- شروق حبيبتي إلى مواعداها أن اكتب عنها بوست بقالي فترة طويله بأجله

3- خواطر عن مواقفعديده مرت عليا الفترة اللي فاتت

......................

طيب دلوقتي بقه أنا عامله البوست ده ليه ...

1- أعتذر عن التدوين في الفترة القادمة وده بسبب زواجي

2- عشان أقول لشروق أوعي تعزلي وتسيبي العماره

3- عشان أشكر أصحابي على النيولوك الجديد إلي في المدونة ... أنا بصراحه دخلت اتخضيت وافتكرت نفسي دخلت مدونة غلط

بجد جزاكم الله خيرا ياكوكو caaaat[ رنين الصمت stophere]

.........................

رساله دي

سمية العريان بعتهلكم

شروق الشواف

ربنا يسعدك انتي ومحمد

تــــاجيـــن

أول تـــــــــــــــــــــاج

تاج مبعوتلى من زمان من الاستاذ وضاح وكل شويه ااجل فيه

كيف يعبر الشخص اذا عصّب أو غضب وكيف ينفس عن غضبه و يتخلص من الحالة العصبية ؟

اول طريقه زى ما علمنا الرسول انه يغير من حالته

يعنى لو واقف يقعد وهكذا

تانى حاجه الوضوء...بجد بيهدى الواحد خالص

تالت حاجه والى بفضلها اوى...انى اتمشى او اختلى بنفسى على الاقل

انا عن نفسى كان المعروف عنى انى مش عصبيه خالص بالعكس بيقولو عليا بارده

بس بقالى سنه او اتنين كده بقيت عصبيه ولا ادرى ما السبب

يمكن قلب الواحد مبقاش زى زمان فبالتالى احتماله للى حواليه اوحلمه مبقاش زى الاول

بحاول دلوقتى انى ابنى قلب جديد ميسمحليش اصلا انى اغضب الا لله وحده

اما بقى لما ابقى زعلانه بعمل ايه

1- بتمشى

2- لو منفعش بقعد مع نفسى واحاسبها وافتكر عيوبى وبالتالى بنسى الى قدامى عمل فيا ايه اصلا

3-بقرا قران بس للاسف مبقتش اقرا كتير زى الاول

4-ساعات لسانى للاسف الشديد بيفلت منى وبندم بعديها

....................................................................

تاني تـــــــــــاج

تاج بقى من امام الجيل

أنت مين؟

بجد سؤال صعب اوى بس هحاول

انا انسانه اخطا واصيب احيانا ...اسير على الطريق واتوه احيانا

احاول ان ابنى لكن اكتشف احيانا انى اهدم بدلا من البناء

ابحث لنفسى عن طريق اكمله الى النهايه دون تردد اريد به الوصول لرضا الرحمن

عندى رساله اريد بها الاصلاح لا الفساد.....لكن لم تكتمل سطور رسالتى بعد

مين اكتر ست شخصيات بتحبهم؟

بعد الرسل والانياء والرسول والصحابه

بحب حسن البنا
بحب الشيخ احمد ياسيين
بحب الرنتيسى
بحب خالد مشعل
بحب عمو ياسر عبده
بحب بابا

أنت سعيد؟

كنت زمان على طول سعيده حتى لو ايه حصل كان عندى رضا باى حاجه

بس دلوقتى مش قادره اقول انى سعيده حتى لو فى مناسبات بتستدعى منى السعاده

مش حاسه بطعم اى حاجه حلوه

لو أجتمعت أنت وحسنى مبارك فى غرفة واحدة هتقوله ايه؟

هقولى فى خالق للوجود اسمه ربنا تعرفه؟؟؟؟؟

لو معاك مليون ونص هتعمل بيهم ايه؟

هابعت شويه لفلسطين

وهعمل بشويه مشروع اسكان لزواج الشباب الى مش لاقيين

وشويه هعمل بيهم مشاريع صغيره لفقراء مش لاقيين

بتحب مصر؟

بحبها اوى اوى اوى ....وساعات كتير ببكى عليها وليها

بتحب البنات؟

اكيد ....بس بعترض على ......

أنت مسلم؟

الحمد لله....نعمه تستحق الشكر ومش بالكلام بس

ليه؟

.الحمد لله

أيه اكتر موقف محرج أتعرضت ليه؟

هما كتير ....بس مش هقولهم ...ان الله حليم ستار

اتصرفت ازاى؟

عادى....بكل برود

أيه الامنية اللى بتدعى ربنا انه يحققها ليك؟

انى اموت شهيده

وانى قبل ما اموت اعمل حاجه اخدم بيها المسلمين

نفسى اصلى فى المسجد الاقصى بعد ما يتحرر ان شاء الله

نفسى ربنا يصلحلى قلبى ويصطنعنى لنفسه ويرضى عنى

هابعت التاج ده لكليوباترا واختى ومللت الصمت والمجاهده ورنين الصمت

الغاز وتساؤلات؟؟؟؟؟؟؟؟؟

تلقيت مكالمه هاتفيه من صديقه لى تخبرنى بانه قد تم القبض على اخوها فجر امس

وعندما عاد ابى من الخارج اخبرنى انه قد تم القبض بالفعل على 48 او يزيد

والسبب اكيد كلنا عارفينه.....انتخابات الشورى

وتذكرنا سويا انا وبابا انتخابات الشعب الى فاتت....وكانت هناك تلك الملاحاظات

1-كان عدد المرشحين فى مجلس الشعب عن الاخوان المسلمين 160

2-عددالمعتقلين فى هذا الوقت من 300 الى 400 تقريبا

3-عدد الفائزين فى المجلس 88

نتكلم عن الشورى

1- المفترض ان عدد المرشحين 20

2-عدد المعتقلين.........هنا الفزوره بقى ....سايباها لتوقعاتكم

3-عدد الفائزين......دى برده انتو وشطارتكم......تتوقعو هيبقو كام

طب سؤال كمان

لماذا يمنع الامن الاخوان من الترشيح فى الاساس

هل هذا دليل على نزاهه الانتخابات...ام ان الاخوان سرهم باتع .....ام ......؟؟؟؟؟؟؟؟؟

سؤال كمان ...استحملونى

يا ترى ما هى الخطوه المقبله....ايه توقعاتكم برده؟؟؟؟

ويا ترى هيبقى عدد المرشحين فعلا 20 ام الى كم سيصل العدد...طبعا بالنازل؟؟؟؟؟؟؟؟؟؟؟

منتظره ارائكم وتفاعلتكم

ايه ومعنى

كنا معزومين قريب فى مكان ما

المهم انهم كان احد المدعويين معانا الشيخ الراوى ربنا يطيل فى عمره حتى يرى الاسلام عزيزا ( كما يدعو دائما)

المهم انهم دعوه لالقاء محاضره علينا.......صراحه اول مره اسمع لشيخ ازهرى كده...ربنا يكرمه بجد

المهم انه اختار انه يتكلم 5 دقائق فقط لا غير فكان موضوعه الذى اختار هو الايه الكريمه

"نسوا الله فانساهم انفسهم "

بجد الايه دى خوفتنى اوى ...لان اكتشفت ان تقريبا الايه دى بتفسر وبتجاوب على تساؤلات كتيره اوى كانت عندى

منها

انا ايه الى غيرنى كده؟؟؟؟ ...ايه الى خلانى ابعد عن ربنا البعد ده كله؟؟؟؟

انا كنت فين لما كنت بعمل الذنب ده؟؟؟؟......كان فين عقلى وقلبى لما كنت بعمله؟؟؟؟؟

انا ليه مسمعتش بنصيحه فلانه صحبتى؟؟؟؟.....انا ايه الى كان بيخلينى ابرر كل حاجه غلط اعملها ومكنتش شايفه خالص الغلط الى فيها؟؟؟؟؟؟

انا كنت فييييييييييييييييييييييييييييييييين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

مش هاقدر اعد الاسئله الى جت على دماغى ساعتها بما يخص نفسى

حسيت ان شريط حياتى كلها بيمر قدامى

افتكر فترات كنت فيها قريبه اوى من ربنا.........فكنت بستعظم اى ذنب حتى لو كان صغير عند الناس

وافتكر فترات تانيه كنت بعيده عن ربنا.....فكنت بستهيف اوى الذنب...مش كده وبس كنت كمان بعطى تبريرات ليا ان ده صح مش غلط

وبجد مكنتش عارفه انا كان فين عقلى ساعتها.......بس الايه دى جاوبتنى

بجد نفسى الناس كلها تتامل فى الايه دى هتلاقىها بتفسر حاجات كتيره اوى بنعملها وبنشوفها فى الزمن ده

يعنى بجد بلاقى ملتزمين بيدعو الى الله وبيعملو الحاجات الى هما اصلا بينهو الناس عنها........وبجد هما مش حاسين انهم بيعملووو غلط

للاسف بقيت الاقيها اليومين دووول كتير اوى......ولانى وقعت فتره فى المشكله الكبيره دى :(

بجد نفسى الناس كلها تاخد بالها من الى بتعمله خاصه الى بيدعو الى الله....لانهم قدوةةةةةةةةةةة

بجد يا جماعه لازم نفتكر ربنا فى كل ثانيه فى حياتنا ......عشان ربنا مينسيناش نفسنا

بجد احنا نسينا نفسنا اوىىىىىىىىىىىىىىىىىىىىىىىى

ومبقيناش حاسين بالى بنعمله ده صح ولا غلط

وفى الاخر

اللهم لا تكلنا الى انفسنا طرفه عين

ياحى يا قيوم برحمتك استغيث اصلح لى شانى كله ولا تكلنى الى نفسى طرفه عين

اللهم اميييييييييييييييييييييييين

حمله الافراج عن الاستاذ ابو الفتوح شوشه

حملة الإفـــراج عن شيــخ المجـاهـــدين

في ظل تلك الهجمة الشرسة التي يتعرض لها كل وطني حر شريف , تتعدى تلك الهجمة هذه المرة خطوطها الحمراء , وتتمادى في غيها المنهجي , لتصطدم برمز من رموز العزة والكرامة في مصرنا الحبيبة , إنه شيخ المجاهدين الذي يربو عمره عن الثمانين , الأستاذ أبو الفتوح شوشة , ورغم ان الكثيرون من قد لا يعرفونه , ربما لأنه ليس بلاعب كرة قدم قديم أو مطرب شهير قد إعتزل ... بل إنه من القلائل الذين ما زالوا أحياء ممن سبق لهم الخروج مجاهدين وقت تقسيم فلسطين عام 48 م , ورغم أن الكل قد تناساه , في غمرة إعتقال نائبي مجلس الشعب من الإخوان المسلمين , وقد تم إعتقاله معهم وقتها بكل القسوة رغم شيخوخته وكبر سنه , إلا أنهم لم يرحموه , ولم تمنعهم كهولته , بل لفقوا له التهمة الشهيرة وهي محاولة قلب نظام الحكم !!! وكأن كهولته وكِبر سنه تسمح له بمجرد التفكير في قلب منضدة و ليس قلب نظام الحكم !!! لكننا اليوم نعلنها إننا لم ننساه , وكيف ننساه ؟؟ وقد حمل لواء الرجولة والعزة آنفاً وخرج ببدنه وماله قاصداً فلسطين ليجاهد عام 1948م اليهود الصهاينة وهو يبغي النصر أو الشهادة , , إنه اليوم له كل الحق علينا في ان ندعمه تماماً , حتى ولو لم يطلب , وحتى ولو لم يعلم , فإننا من منطلق من نمثله من صحافة شعبية , تمارس دورها في تنوير شعوب المنطقة , نعلن اليوم ما الذي يعنيه أن تكون شخصاً كشخص أبو الفتوح شوشة في مصرنا الحبيبة ...

أن تكون أبو الفتوح شوشة فهذا معناه أن تكرم وتصير رمزاً لكرامة الرجال لو كنت في بلد غير مصر ... أما لأنك في مصر ... فهذا معناه أن تصير نزيل أحد السجون وحبيس أحد المعتقلات ...

أن تكون أبو الفتوح شوشة فهذا معناه أن تخرج للجهاد في فلسطين وعمرك لم يتجاوز التاسعة عشر ...فتبلي البلاء الحسن ... ثم تعود لتنال جزائك على جهادك وبدلا من تكريمك يزج بك في السجون 17 عاماً مع الشغل والنفاذ ..

أن تكون أبو الفتوح شوشة فهذا معناه أن تعود من فلسطين راضياً عن نفسك ... راضياً عن جهادك ... راضياً عما فعلته لرفع لواء الذود عن فلسطين ... فلا يرضى عنك النظام ... لتذوق الويل والتعذيب في السجون المصرية ...

أن تكون أبو الفتوح شوشة فهذا معناه أن تخرج من السجن بعد 17 عاماً كاملةً لتمارس رسالتك في البناء والاصلاح من جديد ... بدون أن تتغير قناعاتك أو تتزعزع ثقتك في نفسك ...

أن تكون أبو الفتوح شوشة فهذا معناه أن تترشح في انتخابات مجلس الشعب لعام 1987م ... فيهب جميع أبناء دائرتك لإنتخابك ... بما فيهم أقباط دائرتك بالكامل .... فتنجح نجاحاً باهراً ... ثم يتم حل المجلس لأجل إسكاتك ...

أن تكون أبو الفتوح شوشة فهذا معناه أن تتحصن بحب الله و تحظى بحب الناس لك ...... لكنك في الوقت نفسه تجد أن النظام يُكن الكره لك ... ويعتقلك المرة تلو الأخرى ...

أن تكون أبو الفتوح شوشة فهذا معناه ألا يرحموا شيبتك وأنت قد قاربت الثمانين ... فيزجوا بك في المعتقلات غير آبهين ... ويحولوك لمحاكمة هزلية غير مستنكرين ...

أن تكون أبو الفتوح شوشة فهذا معناه أن تُحارب في رزقك وسكنك وراحتك وانت شيخ كبير ... ويضيقوا عليك كل شئ حتى يسجنوك ... في الوقت الذي تتمنى أن تنعم فيه براحتك ...

أن تكون أبو الفتوح شوشة فهذا معناه جهاد في صغرك ... تعذيب في شبابك ... بهدلة في كهولتك ...

أن تكون أبو الفتوح شوشة فهذا معناه ... اننا معك حتى النهاية ... نهاية ظلمهم أو نهايتهم ...


-------------


لماذا يا شــيـــــخ المجــــــاهــــدين ؟؟؟

لماذا إعتقولك ؟ ولم يرحموا ضعفك ؟

لماذا حبسوك ؟ ولم يراعوا سنك ؟

لماذا أتعبوك ؟ ولم يلتفتوا لمرضك ؟

أتحب ان تعرف لمـــــاذا ؟

لأنك ببطولتك قد كشفت زيف أساطيرهم

لأنك بجهادك قد عريت جبنهم

لأنك بإقدامك قد أظهرت ضعفهم

آآآآآآه يا شيخ المجــــــاهدين

قد تعودت أن تقاتل ببندقيتك أعداء الله

لكن ماذا تفعل مع هؤلاء ؟؟؟

قد إعتدت أن تقنص بسلاحك أعداء الأمة

لكن ماذا تفعل مع هؤلاء ؟؟؟

إعـــــــــذرهم أولاً

فإنهم لا يعلمــــــون

وإعذرهــــــم ثانياً

لأنهم في مقــــــام أولادك

وإعفو عنهم وإصفح

ولا ترفع يداك بالدعاء عليهم

أرجوك يا شيخــي

سامحهـــم وإعف عنهـم

وأرفع أكفك بالدعاء لهم

وأنت قـــائم تصـلي

إدعو لهم بأن يهديهم الله

فيعلموا ما تعلمــه

و إدعو لهم بأن يستيقظوا قريباً

فـيــــرون ما تراه

لقد كنت تجاهد الإنجليز بصدرك

وقتما كانوا في صلب آبائهم

لقد كنت تجاهد اليهود بوجهك

وقتما كانوا في علم الغيب

آآآآآآآه يا شيخــــــــي

إعـــــــذرني

فقد دار الزمان وولى الرجال

وتغير المعيـــــار وكثر الخبال

فهؤلاء الصبية من حولك

يحسبون انهم بقامتك

أو من مقامك

لكن لا تحزن يا شيخي

فمهما اختلط الأمر على الجميع

فإننا نعلم في النهاية من أنت

ومن هؤلاء الحثالة




-------------


الروابط :

مدونة انسى تعلن بدء حملة الافراج عن شيخ المجاهدين
http://ensaa.blogspot.com/2007/05/blog-post_17.html

مدونة انسى تذيع نبأ اعتقال شيخ المجاهدين
http://ensaa.blogspot.com/2007/04/blog-post_9947.html

مجلّة "فلسطين المسلمة" تذيع فقرات من جهاد شيخ المجاهدين
http://www.fm-m.com/2003/aug2003/story24.htm

لمعرفة معلومات متعلقة بحياة شيخ المجاهدين يرجى زيارة مدونة الحرية لأبو الفتوح
http://freeaboalftouh.blogspot.com/

عن جهاد شيخ المجاهدين المصريين في فلسطين pdf ملف
http://www.fm-m.com/2003/aug2003/pdf/51.pdf

رابط تقرير جريدة الدستور عن شيخ المجاهدين بتاريخ 13/5/2007
http://www2.0zz0.com/2007/05/17/21/81829036.jpg

.....................................

اعتذر عن وضع الصور لان الجهاز مهمج ومش راضى

واتلم الشمل خلاص

اخيرا وبعد انقطاع دام سنوات رجعنا الجلسه الاسبوعيه لاسرتنا الكريمه

يااااااااااااااااااااااااااااااااااه

بجد كانت وحشانى اوى

وطبعا اكتر حاجه كانت وحشانى الحكم

ان شاء الله هابقى احكلكم كل مره اخدنا فيها ايه

احنا قاعدنا مرتين الى الان

اول فقره معانا القران ومع سوره المؤمنون

وكانت الخاطره الى على السوره هى الخشوع فى الصلاه

وكانها رساله من ربى ان يكلفنى بابا بتحضير فقره عن الخشوع فى الصلاه للمره القادمه

وياريتنى محضرت اكتشفت انى صلاتى دى مش صلاه

ربنا يرزقنا الخشوع يااااااااااااااارب

نيجى لتانى فقره وهى الحكم

وحكمه اليوم هى


"ام كيف يرجو ان يفهم دقائق الاسرار وهم لم يثب من هفواته
"
حلوه اوى الحكمه دى هاحاول اشرحها شرح مختصر

اولا الهفوه هو الوقوع فى الزلل من غير قصد

وبتراكمها يحدث الران على القلوب

وهى تمنع ان يفهم الانسان الاسرار الموجوده او هو العلم الذى يعلمك الله اياه


"واتقو الله ويعلمكم الله
"

يقول ابو سليمان الدرانى

اذا عقدت النفوس على ترك الاثام جالت فى الملكوت ورجعت الى صاحبها بطرائف الحكمه من غير ان يؤدى اليها عالم بعلمه

يعنى الواحد لو ترك الذنوب ربنا هيعلمه الحكمه من غير ما يعلمهاله احد

وفى حديث

من عمل بما علم ورثه الله مالم يعلم

اخر حاجه فى الحكمه بقى هى كلمه للجنيد عندما سئل

كيف السبيل الى  الانقطاع الى الله؟؟

قال

بتوبه تزيل الاصرار

وخوف يزيل التسويف

ورجاء يبعث على مسالك العمل

واهانه النفس بقربها من الاجل وبعدها من الامل

قيل له

فبما يصل العبد الى هذا؟؟؟

قال

بقلب مفرد فيه توحيد مجرد

والمفردون هم الذاكرين الله كثيرا والذاكرات

ده تلخيص سريع للجلسه الاولى

والمره الجايه هديكو الواجب بتاعى الى هو الخشوع فى الصلاه

ودمتم بخير

فضفضه فى يوم ميلادى

بصو بقى انا كنت كاتبه موضوع طويل عريض وبعد ما كتبته اتمسح غلط

ودى مش اول مره يعملها معايا انا تعبت وزهقت

كنت داخله افضفض لانى مضايقه اوى بس بجد اتنرفزت

انا كرهت الكمبيوتر على المدونه المنيله دى على البوست المنيل ده كمان

ونفسى اضرب حد اطلع فيه الغل الى جوايا ده

كتبت من كام يوم بوست طويل عريض برده

ولسه هانزله راح النور قطع

روحت والله ما انا منزلاه وفعلا منزلتهوش

مش عايزه احلف على حاجه دلوقتى

نرجع للموضوع انا كنت داخله اقول ايه؟؟؟؟؟؟؟؟؟

اه افتكرت

انا كنت داخله اكلم نفسى لانى مش عايزه اكلم حد فمحدش يستغرب من الى هيتكتب

اعتبرونى واحده مجنونه وبتتكلم نفسها

ها يا ست سميه عايزه تقولى ايه ايه الى مضايقك قولى وخلصينى

حاضر هتكلم بس براحه عليا شويه

انا المفروض انهارده انى تميت سن الرشد يعنى 21 سنه وبدل ما ابقى مبسوطه وفرحانه فانا مخنوقه

هتقوليلى ليه مخنوقه هاقولك اهو



1-حاسه انى تايهه ومش عارفه انا رايحه فين

يعنى مش قادره افهم نفسى ومش عارفه انا عايزه ايه

كل اما امشى فى طريق اكتشف انه مش طريقى ولا اهدافى ولا شخصيتى اروح راجعه فى نص السكه

متخرجه بقالى سنه وما انجزتش اى حاجه فى حاجه

نفسى انجز فى المجتمع واعمل حاجه عليها القيمه

مش عايزه ابقى زى اى بنت اتخرجت واتجوزت وقعدت فى البيت

نفسى اعمل حاجه لنفسى وللمجتمع

نفسى احس انى بادى الناس حاجه وفى نفس الوقت تبقى مناسبه لقدراتى ومهاراتى ومواهبى

بس المشكله انى مش عارفه ايه هى قدراتى ومواهبى دى

عماله اجرب وانا مغمضه وكل شويه اكتشف انى ماشيه غلط

ربنا يهدينى ويصلح لى حالى

هذا فضلا عن القران الى حفظته ونسيته والورد الى وقع نصه واخلاقك الى باظت....يا حفيظ

ربنا يهديكى يا سميه ويصلح حالك يا رب

قولو امين


2-اما بقى تانى حاجه مضايقانى انى وبمناسبه مرور عام جديد من عمرى قعدت اقيم السنه دى

وللاسف الشديد جدا اكتئبت

ايه كميه الاخطاء الفظيعه دى

اخطاء عمرها ما وردت على حد

اخطاء عمرى ما كنت اتصور انى اقع فيها

حاسه انى كنت عاميه السنه دى

نفسى اعتذر لناس كتيره اوى قابلتهم واتعاملت معاهم السنه دى

بتكسف من نفسى كل اما اشوفهم لغايه انى بقيت اتمنى انى ماشوفهمش تانى

بتمنى من ربنا انهم يكونو مسامحنى

من الاخر سنه ضعت من عمرى بدل ما ادي فيها

كنت انا الى عائل على البشريه فيها

صغرت السنه دى كام سنه لورا بدل ما اطلع لقدام



3- تالت حاجه مضايقانى

فانا مضايقه من شباب من الاخوان كتير بيحسبو نفسهم بيعملو حاجات صح

لكن للاسف هيكتشفو بعدين انهم الى بيعملوه ده غلط

يعنى بسمع وبشوف تجاوزات كتيره اوى مش احنا الى نعملها

كنت عايزه انزل بوست عليها

بس بصيت لنفسى لقيت نفسى مليانه عيوب واخطاء

فقلت اتنيلى وصلحى نفسك الاول قبل اما تبصى لغيرك

وكمان مش انقد حد من باب النقد يعنى لازم انقد نقد بناء

ربنا المستعان واقدر اعمل حاجه



4- اما بقى رابع حاجه مضايقانى الهم الازلى الى مش هنخلص منه ابدا

الامه الاسلاميه الى بضيع وانا قاعده بتفرج عليها

يا فرحتك بنفسك يا سميه

نسيتى اخواتك ومش بتقدملهم اى حاجه

للاسف انشغلت بهمومى الشخصيه ونسيت ان فى فلسطين بتنادى

والعراق دلوقتى والبقيه تاتى

ايه الى قدمتيه

يا حسره عليكى

حتى الدعاء نسيتيه

اللهم احفظنا

بس كده هما دول الحاجات الى مضايقنى



طب هو انتى داخله تكلمى كده وخلاص طب يا بنتى ما تفكرى هتعملى ايه

اممممممممممم

طب نمسك حاجه حاجه


بالنسبه لرقم واحد المستقبل

1- هاركز فى اسلام اون لاين وسيبنى من عشرينات ان شالا محد حوش

2- هاخد ام الكورس الانجليزى الى مش راضى يتاخد ده

3- هاركز فى معهد القرن عشان اراجع القران الى نسيته وابطل تهريج بقى

4- هافكر واستخير فى العرض بتاع شروق وربنا المستعان



اما بقى رقم اتنين الى هو السنه الى فاتت

1-هاستغفر ربنا لان ربنا غفور رحيم (مع انى عملتها كتير والله)

2-هاتعلم من اخطائى وابص لايجابيات السنه الى فاتت

3- كفايه انى اتعرفت على اصدقاء عمرى ما هنساهم فى حياتى ابدا هما عارفين نفسهم 



اما رقم تلاته الى هما شباب الاخوان بنات وبنين

1-هحاول اعمل بحث عن الانفتاح الاسلامى يعنى ازاى ننفتح من غير تجاوزات

2-هاخد اراء وفتاوى ناس كبار

3-انزل حلقات مسلسله فى الموضوع ده

4- ادعولى متبقاش حماسه والسلام



اما بقى رقم اربعه الامه بتاعتنا

1-بجد ان شاء الله ناويه منساهمش من دعائى تانى

2-واحاول اتصدق ولو باليسير

3-واحاول اوصل القضيه عشان منسهاش تانى

بس كده انا كده ارتحت وخرجت الى فى قلبى



........................................................

ما ينفعش اقفل البوست ده من غير ما اشكر حبايبى وصحابى الى عمالولى احلى عيد ميلاد فى الدنيا على المنتدى

رحاب صاحبه مدونه رنين الصمت

وسميه صاحبه مدونه استوب هير بس بالانجليزى

وطبعا منساش جارتى وحبيبتى شروق الى طلعت قعدت معايا وانا مخنوقه واستحملتنى وعزمتنى على سندوتشات كده وكده

:D


 ومتنسونيش فى الدعاء بقى الله يكرمكم ومنجلكوش فى حاله اكتئاب ابدا

رساله

الى كل من اعتقل من اجل اعلاء كلمه الله ولكل من حوكم ظلما وزورا لاجل قيام دعوه الله فى الارض

ولاهالى هؤلاء المعتقلين اهدى تلك الكلمات من على لسان الشهيد حسن البنا حينما مروا بازمه مشابهه


"مرحبا بما حدث وبما يحدث وبما سيحدث ان دعوه كدعوتنا ورساله كرسالتنا ان لم تلق مثل ما لقيناه واكثر فلن تسمى

دعوه وهكذا شان جميع الدعوات وهل تظنوا اننا سنصل الى تحقيق رسالتنا على طريق مفروش بالزهور والرياحين

اننا لم نفاجا بهذه الاجراءات الظالمه على الرغم من قسوتها بل اننا كنا نتوقعها وكنا نعرف تماما اننا سنصطدم بها ولقد

كان شعارنا وسيظل للابد

الموت فى سبيل الله اسمى امانينا

وثق ان الغلبه فى النهايه ستكون للحق وان النصر سيكون فى جانب المؤمنين مهما بعدت الشقه

ان دعوتنا سبيلها الجهاد والاستشهاد ولقد وطن الاخوان انفسهم على حب الجهاد والاستشهاد

ولقد خبرتهم حرب فلسطين بذلك"

اشواك الورد

ا


تمر الايام بنا جميعا وتحمل فى طياتها ذكريات لا حصر لها

منها ما نسعد به ونتمنى ان يعود

ومنها ما نخجل منه ونتمنى ان تعود بنا الايام كى نعيد تقييمنا للمواقف وبالتالى نتصرف بالشكل الصحيح

 من الطبيعى ان يقل عدد اخطاء الفرد كلما مر به العمر ولكن وجدت حالى ليس كحال الجميع

فقد  كان  اخطائى قديما تزيدنى خبره لا تزيدنى حسره كما يحدث الان

 فالاونه الاخيره خرجت الامور عن سيطرتى

وبالتالى فقد ارتكبت حماقات كثيره فى الفتره السابقه و وجدت نفسى اشعر بحنين الى الماض الى مرحلتى الاعداديه والثانويه











وجدت حنين يجرفنى الى تتلك الفتاه التى لم تكن تعرف الحزن الا لتتضييعها طاعه او عباده

الى تلك الفتاه التى كان القران انيسها فكانت تذوب عشقا فيه فاصرت على حفظه

تلك الفتاه التى كانت خلوتها بربها هى ابلغ لحظات ومعانى السعاده لديها

تلك الفتاه التى كانت راحتها من راحه الاخرين فكانت تعمل دوما على راحتهم دون تافف او ضيق

تلك الفتاه التى لم تشتكى منها امها فى يوم من الايام

تلك الفتاه التى لم تحمل فى قلبها غلا او حقد او سوء ظن لاحد

تلك الفتاه التى كان يومها ليس ملكها ولكن ملك ربها

تلك الفتاه التى كان منتهى امالها واحلامها الشهاده ولقاء الرحمن

لكن ماذا حل بتلك الفتاه؟

لا ادرى متى بدات نهايتها؟ ومتى وكيف انتهت؟

هل صدقا انتهت تلك الفتاه؟هل صدقا ولدت فتاه اخرى؟

لا تدرى ماذا تريد..ماذا تفعل...تعيش متخبطه فى الدنيا

لا تدرى ما الصواب من الخطا

اين الطريق؟

تاهت عن الطريق




قد اغرتها الدنيا...اغرتها حياه جديده مليئه بالناس والاحداث

فعاشت معهم جسد بلا روح

تمردت على النعيم واختارت الورد الذى لا يخلو من الاشواك

لم تشعر بتلك الاشواك الا بعد فقدناها الكثير من النعم

فلم يعد القران انيسها

ولم تعد تخلو بربها

ولم تعد الام راضيه

ولم يعد القلب صافيا

واصبح الحرمان حالها







وها هى الان تحاول ان تستخرج تلك الاشواك التى آذتها كثيرا

ولكن يالا صعوبه الامر

فقد كانت تعتقد ان الامر اكثر سهوله من هذا بكثير

فالامر يتطلب وقتا كثيرا كى يداوى جروح الاشواك

وها هى تحاول فليدعو لها الجميع بالثبات والاصرار





..............................................................

كانت تلك الخواطر والتى ترددت كثيرا فى كتابتها بمناسبه اقتراب يوم مولدى لاتمامى ال21 عام

وبتلك المناسبه اقدم اعتذارا لكل من تعاملت معه بحماقه او انانيه او سوء ظن

اطالب كل من اسات اليه ان يسامحنى وان يغفر لى زلاتى

اطالب كل من قصرت معه ان يعفو عنى

وفى المقابل فقد طهرت قلبى من كل ضيق كنت احمله لفرد

والتمست الاعذار للجميع

وفى النهايه ارجو من الجميع ان يدعو لى









"ربنا لاتآخذنا بما نسينا او اخطانا

ربنا ولا تحمل علينا إصرا كما حملته على الذين من قبلنا

ربنا ولا تحملنا مالا طاقه لنا به

واعف عنا واغفر لنا وارحمنا انت مولانا فانصرنا على القوم الكافرين"

تاج

وصلنى تاج من كش ملك ووضاح

اعتذر على التاخير بس الكمبيوتر كان بايظ كالعاده

نبتدى نجاوب بسم الله

احب شخص لقلبك فى الدنيا؟

الرسول وسيدنا ابراهيم عليه السلام 

ومن الناس الى عايشين ماما وبابا

انسان مستعد تضحى بحياتك عشانه؟

اى انسان بحبه من قلبى واولهم بابا وماما

واى انسان بيعمل لنصره الاسلام والرسول وبيضيف فعلا للمجتمع

اسم اول حب؟

ماما وبعدين بابا

وبره عالم الاشخاص فالقران الكريم

اسم اخر حب؟

محمد

ماهو اجمل كتاب كتبه بشر قراته ومحتفظ به حتى الان؟

كتابات ابن القيم الجوزى وحكم بن عطاء الله

وحديثا كتابات  مجدى هلالى خاصه الايمان اولا فكيف  نبدا  به

بس طبعا مقراتهمش كلهم

اسم كتاب كتبه بشر انت متعلق بيه وبتقراه كل فتره؟

حكم بن عطاء الله

اهم جهاز منزلى انت متعلق بيه وبتستخدمه كتير؟

المروحه فى الوقت الحالى التكيف فى الفتره القادمه

الكمبيوتر سابقا بس شكلى هبدا اتعلق بيه تانى

شىء بتحس براحه نفسيه لما تنظر اليه؟



البحر ساعه الشروق والغروب ومعاه السماء واجزاء من السحاب كانك تجلس فى قاعه دائريه

ويبقى حلو اوى لو فيه جنينه على البحر

وطبعا النيل والخضره جنبه عل الجنبين

مكان تحس به بالحنين الى شىء لا تدرى ماهو وذكريات جارفه الى لا شىء؟

بيتنا القديم وخاصه اليالكونه بتاعه حجرتى

مكان تحس فيه بالراحه عندما تدخله؟

مسجد نور الاسلام زصلاح الدين

اجمل مدينه زرتها داخل مصر؟

 والساحل الشمالى والاقصر والعين السخنه بالترتيب

اجمل مكان طبيعى رايته داخل مصر؟

النيل والجبال الموجوده فى طريق العين السخنه الجديد

نوع هاتفك المحمول؟

sony ericsson z600

سرعه بروسيسور جهازك؟

معرفش

حجم ذاكره الهارد؟

110

المواد التى تشغلها المواد الاسلاميه على جهازك؟

معرفش بس اظنها نسبه كويسه

نفس المساحه السالف ذكرها فى قلبك-الاجابه لنفسك عشان الاخلاص؟

نسالكم الدعاء

اهم هدف انت وضعه لحياتك دلوقتى؟



اراجع القران واخد كورس انجليزى

مواصفات فتى او فتاه الاحلام بالنسبه لك؟

على خلق ودين وكريم وملتزم اكيد وبيعمل فى الدعوه وحافظ القران ويكون بيقدر المراه وحقوقها

والحمد لله ربنا رزقنى خلاص

صف ما ياتى :شعورك لما بتسمع كلمه مصر؟

بحس انها محتجانا اوى عشان نخرجها من سجنها الى هى فيه

شعورك لما بتسمع كلام عن اليهود

بفتكر الذل الى احنا فيه

شعورك لما بتشوف ضابط شرطه؟

ضابط عادى بيصعب عليا

ضابط امن دوله بدعيلو لاما ربنا يهديه لاما يخلص الناس من شره

شعورك لما بتشوف الكناس العجوز فى الطريق؟

بيصعب عليا وببقى نفسى اروح اخفف عنه بس خجلى بيمنعنى


لون البطانيه الى بتتغطى بيها فى الشتاء؟

بنى فى ابيض

لون الجورب المفضل لديك؟

الاسود

احساسك لو داست قدمك على مخلفات حيوان فى الشارع ولا مؤاخذه؟

هضايق طبعا

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟

امممم....هتمنى انه يكون قدوه كويسه للناس وتكون اخلاقه زى مظهره

احساس يراودك فى اشارة مرور مغلقة بسبب مسئول كبير؟

بقول فى سرى امتى ترجع ايام سيدنا عمر كان بيمشى وسط رعيته دون ان يخاف شىء الا الله


ياااااااااااااه اخيرا خلصته انا جاوبته على مرتين

ابعته لاحلى ما فى الدنيا

جسر التواصل

وكليوباترا 

تليفون ابكانى.......سامحينى ارجوكى

انا مش عارفه ابتدى منين الكلام انا كنت ناويه اعمل بوست تعليق عن كلام شاب مصرى

بس انا لسه قافله الخط مع واحده صحبتى اوى وعزيزه عليا اوى

وبجد مقدرتش اكتب كلمه عن الموضوع

والبوست ده انا عاملاه ليها هى

بجد اتالمت كتير اوى من كلامك معايا على التليفون وبكيت بعد ما قفلت معاكى الخط

انا مش هقول اعذار ولا هطلب منك انك تلتمسى ليا اعذار

انا كل الى هطلبه منك انك تسامحينى من قلبك

انا مش عارفه انا عملت فيكى حاجه حلوه تفتكرهالى ولا لا

اتمنى انى الاقى رصيد ليا عندك يغفرلى الغلطه دى

وبجد والله انا مش بفضل مصلحتى على اخواتى...انا بجد زعلانه ان الحركه خرجت منى كده فى الاخر

بس بجد وبتكلم بكل صدق وربنا شاهد على الى هقوله

له الحاجه دى مضايقاكى انى اكمل فيها فانا مستعده اسيبها عشانك

انا عمرى ماهضحى بيكى عشان اى حاجه خاصه لو كانت دنيا

الفرص دايما بتيجى وتروح لكن الاصدقاء عمرى ماعرف اعوضهم

انا مش هاعرف انام الا بجد لما تقوليلى انك مسامحه من كل قلبك

وباعترف انى غلطت فى حقك واخطات

واطلب السماح والغفران...وهى حاجه مش بعيده عليكى

بابا حبيبى

اليوم يصادف يوم ميلاد ابى هيتم ال53 سنه....عقبال عندكم

وبهذه المناسبه السعيده قلت اكتب عن لمحات فى حياه ابى

اولا : نشأته

نشأ ابى فى بلده ناهيا بالجيزه وهى بلده ريفيه بس اهلها طيبين اوى

مات جدى الى هو والده عندما بلغ ابى ال6 سنين يعنى بابا اتربى يتيم الاب

وكان هو اصغر اولاده ويعتبر عمى الاكبر هو الى مربيه

كانت الهوايه المعروفه لابى فى الصغر والى الان هى القراءه

كان بيحوش مصروفه ويروح المدرسه مشى عشان يشترى كتب يقراءها

ثانيا : تعليمه

الصراحه انا مش عارفه بابا بيحب العلم اوى كده ازاى

يعنى هو فى الاول متخرج من طب القاهره

وبعدين اخد ليسانس الحقوق وهو عضو مجلس شعب وده عشان يتكلم فى المجلس عن علم

وبعدين اخد شريعه ازهر بتقدير امتياز

ومعاها اخد ليسانس اداب تاريخ بتقدير جيد جدا

واخر شهادتين اخدهم وهو فى سجن المزرعه لما كان محكوم عليه بخمس سنين

وكان بدا فى معهد القراءات بس لانشغاله لما خرج من السجن مقدرش يكمل فيه

ثالثا : حياته معانا

مش قادره انسى اللقاء اليومى الى كان بابا بيعمله معانا بعد الفجر يوميا وده كان قبل اعتقال 95 يعنى كنت صغيره

كل الى افتكره دعاء شروق الشمس الى كنا بيحفظهولنا يوميا

اما بقى الخمس سنين بتوع المزرعه

كانت طريقه التواصل بينا وبين بابا الجوابات

مكنش بيفوت مناسبه ولو صغيره الا ولازم يبعت ليها جواب

بدايه الدراسه والهجره والمولد وعمليه الزايده الى عملتها

يااااااه...مش قادره انسى جوابات قبل الامتحان .....كان بيعملى جدول كل ترم اذاكر كل ماده ازاى وجدول لتنظيم وقتى

مفيش مناسبه الا ولازم يبعت جواب

لما خرج بقى....كانت ايام الامتحانات دى بعيش ملكه فى البيت...بابا كان لازم يعملى القهوه والفطار الصبح بعد الفجر عشان يشجعنى على المذاكره

ولو مش فاهمه حاجه يحاول يقرأها معايا ويشرحهالى

ولا الجلسه الاسبوعيه الى كنا بنقعدها بعد ما خرج من الخمس سنين كانت حكايه

كانت الفقره الاساسيه فيها حكم بن عطاء الله

كان بيشرحهالنا ويخلينا نحفظها ويعملنا فيها مسابقه

بجد كانت ايام حلوه اوى ...للاسف مش بنقدر نقعد القاعده دى دلوقتى ..بسبب مشغولياتنا كلنا ...بس بجد هحاول ارجعها تانى

رابعا : بابا مع نفسه

بابا عنده طقوس يوميه لا يمكن لاحد المساس بها اطلاقا

اولا يصحى الفجر او قبل الفجر بشويه ....يصلى

وبعدين يطلع من المسجد ...لابد من فنجان القهوه الصباحى مع فصين طوم مع 7 تمرات على السنه

وبعدين ينزل يتمشى ساعه تقريبا واذاعه لندن فى ودنه والسبحه فى ايده ولسانه مع اذكار الصباح

وهو راجع من المشى لازم يكون هناك وقفه عند الراجل بتاع الجرايد...ياخد جوله سريعه على الجرايد كلها وهو واقف

وبعدين يطلع ياخد الدش بتاعه

وبيكتب ما يفتح الله به عليه من مقالات وابحاث

ويروح المكتب والنقابه وباقى مشغولياته

وبيرجع غالبا بعد الظهر يتغدى وينام ويصحى ياخد الفنجان التانى والجنزبيل واحيانا الشاى الاخضر

وبعدين يتفرج على الجزيره والبي بي سي والسى ان ان

يعنى وكالات الانباء كلها

ونظره على الجرايد تانى كلها بس المره دى بتمعن

ولازم يقرا فى الحكم كل يوم ...عشان بيشرحها للناس بعد الفجر

حكايه بابا مع الحكم دى هعملها تدوينه خاصه

بس بجد انا بفتخر ان الراجل ده بابايا

كان نفسى احكى اكتر من كده كتير

بس الحكاوى مش هتخلص عليه

لو قدرت ممكن اعمله تدوينه تانيه

وفى الاخر بدعيله

كل عام وانت الى اقرب وعلى طاعته ادوم وللجنه اقرب وللنار ابعد وللقران احفظ وللرسول اتبع

جسر التواصل

وانا اتصفح المدونات فى الفتره الاخيره

لاحظت ان هناك مجموعه من الشباب الاخوان لديهم رؤى مستقبليه للاخوان

ونقد ذاتى للاخوان

وتساؤلات كثيره حول الوضع الحالى للاخوان

وهم لا يتكلمون بلسان حالهم فقط ولكن عندما تقرا لهم تجد ان هذه التساؤلات تدور فى اذهان اغلب الشباب

ولكن لماذا؟؟؟؟

لماذا ذلك الغموض حول مستقبل الاخوان ؟

لماذا ذلك الغموض حول مواقف الاخوان؟

اعلم انى انتمى لجماعه هى من اكثر القوى المؤثره على الساحه العالميه وليست المصريه فحسب

كما اننى اثق فى قيادتنا تمام الثقه

واعلم ان لديهم من الخبره ما يطمئنى الى حد ما على مستقبلنا

ولكن ارى مشكله كبيره تواجهنا نحن الشباب

وهى الانفصال عن قيادتنا بصرف النظر عن السبب

نحن الشباب فى اشد الاحتياج الى من يسمعنا ويستوعبنا من قادتنا

فاتحت ابى بما يدور فى خالدى من تلك الافكار

وسالته لماذا لا يدخل مدوناتنا نحن الشباب ويرى ما نكتب وعلى ماذا نعترض وعن ماذا نتسائل

فرد علىٌ بان ابعث له لينكات المدونات على ميله الخاص

لكنى لا اراه حلا سليما

فلماذا لا يكون هناك لقاء دائم بين قيادات الاخوان وشباب الاخوان على شكل صالون مثلا يكون وصله بين الاجيال

يكون بمثابه جسر تواصل بين القيادات الحاليين وقيادات المستقل

هذا مجرد اقتراح اتمنى من الجميع ان يدلى برايه ومن يرى اقتراح اخر فلا يبخل علينا ؟؟؟؟؟

وجزاكم الله خيرا

اين الامان؟؟؟؟

القت القوات المصريه القبض على السيد محمد سيد صابر بتهمه التجسس

اصدرت المحكمه اليوم الحكم على العطار بالسجن 15 سنه بتهمه التجسس



كان من المفترض ان يسعد الانسان من هذين الخبرين وان يبجل فى نشاط اجهزه الامن المصريه لحفاظها على امن البلاد



لكن عند سماعى هذه الاخبار لم اشعر باى سعاده فقد دب الشك الى قلبى



واخذت اتسائل عن صدق الاجهزه الامنيه فى مصر



فبصراحه ما تفعله الاجهزه الامنيه فى مصر فى المواطنين من تلفيق اتهامات واعتقالات مستمره بسبب وبدون سبب تجعل كل من يقرا هذه الاخبار يفقد الثقه فى حكومتنا الموقره



كيف اثق وقد دفع ابى اكثر من سبع سنوات من عمره فى السجن ظلما وزورا



كيف اثق ونحن الان نرى اخواننا الشرفاء وراء القضبان يتهمون بقضيه غسيل الاموال



اصبحت اشك فى كل مسجون هل فعلا يستحق السجن ام ان التهمه ملفقه لانه سب هذا من الوزاره او لعن هذا من الرئاسه



لم يعد هناك امن يشعر به الانسان فى وطنه



فبالله عليكم اين اشعر بالامان وانا فى بيتى ومهدده ان يدخل علىٌ ايأ من رجال امن الدوله فى اى وقت وما ذلك منا ببعيد



اشك ان يكون شرب هؤلاء المسئولين من نيل مصر



يمكن بيستوردو مياههم من امريكا فاصبح ولائهم لامريكا بدلا من مصر



بجد نفسى اعيش فى بلدى من غير ظلم



او قهر



او شك



نفسى البلد دى تنضف من كل الى بيلوثوها باعمالهم



يا رب امتى الفرج؟؟؟؟؟

تاج

ده تاج من اختى اسماء هاعيش واتحدى احزانى


ماذا استفدت من حمله اعتقال االاخوان الاخيرة........هل استفدت معنوياكسبت اصدقاء جددعرفت حاجات مكنتش عارفهايعنى حاجات من
دى؟؟؟؟؟؟

نعم اكيد استفدت من حمله الاعتقالات دى

يمكن اول حاجه جت على بالى هو تفكيرى فى السبب

فقلت لنفسى انه لاما ابتلاء من ربنا....لان ربنا بيبتلى عباده المؤمنين...وهنا يكون موقفنا الصبر

وبرده فكرت انها شئى ياكد اننا على الدرب الصحيح

لاما يكون تمحيص من ربنا لينا وانا هنا اقصد الاخوان عامه وليس المعتقلين فقط وهنا نحتاج الى اعاده نظر فى كثير من الامور

ومحاوله تصحيح اوضاع كثيره

وتالت حاجه فكرت فيها هى ان ده يكون بذنوبنا "اقصد الاخوان عامه وليس المعتقلين" وهنا يستوجب الاستغفار

على مستوايا الشخصى شعرت بالمسئوليه الذاتيه اتجاه الاعتقالات دى لانى فرد من الاخوان وبالتالى اعدت النظر فى كثير من افعالى وقبل هذا بعلاقتى بربى

وبس

ألم الحيره

من السهل عليك أن تأكل ما تريد ...

أو أن تذهب إلى حيث شئت ...

أو أن تتحدث إلى من تريد ...

أو أن تقاطع من تريد ...

أو أن تشتري ما تريد ...

أو أن تقرأ ماتريد

أو أن تلبس ماتريد

لكــــــــــــن ....

من الصعب عليك أن تقرار ماتريد ...

خــــاصة ...

إذا كان قرارك لا يخصك واحدك يل يخص أشخاص آخرين ... من الممكن ان يغضبوا لهذا القرار ... ليس فقط الغضب بل سيلحق بهم الآذى ...

حينهـــــــا

تتوقف لحظات ... بل أيام قد تمتد لشهور قبل أن تتخذ القرار ...

حينهـــــــا

يتملكك ألم الحيره ....

العقل أم العاطفه ...؟!!

أنت أم الأخرين ...؟!!

لاتدري مــــاذا تفعل ...؟!!

أو كيف تفكر ...؟!!

تتمنى ....

تتمنى حينهـــا لو يتوقف الزمن حتى لا تتخذ القرار ...!!

تتمنى لو أن القرار ليس بيدك أنت ...!!

تتمنى أن تنتهي بك الحياة قبل أن تنهي حياة الآخرين ...!!

أو

أن تعيش جسد بلا روح